Экономика

Россельхозбанкны Къабарты-Малкъарда бёлюмю быйыл биринчи кварталда адамлагъа 130 займны чеклеринде 100 миллиондан аслам сом бергенди. Ол а озгъан жылны бу кезиуюню кёрюмдюсюнден эки кереге кёпдю, деп билдиргендиле финанс учрежденияны пресс-службасындан.

Россельхозбанкны Къабарты-Малкъарда бёлюмю быйыл биринчи кварталда бир минг чакълы тёлеу карта чыгъаргъанды. Хайырланыучула бегирек да VISA Instant Issue картаны жаратадыла. Финанс учреждение аллай 232-син  бергенди, деп билдиргендиле аны пресс-службасындан.

Нальчикде онбеш майданда  «Россейде ишлеу. Амалланы кезиую. Бюгюн бирге тамблабызны къурайбыз» деген ат    бла  ишчи жерлени битеуроссей ярмаркасы бардырылгъанды.  Аладан бири Къырал концерт залда ётгенди. Кёргюзтюлген ишчи жерлени саны 1,3 мингден атлагъанды.

Къабарты-Малкъарда газ бла жалчытыуну айнытыу бла байламлы, кеси да 2021-2025 жылла бла чекленнген программагъа бизни республика бла «Газпром» ПАО къол салгъандыла, деп билдиргендиле «Газпром межрегионгаз Нальчик» компанияны пресс-службасындан.

КъМР-ни Башчысы Казбек Коков  бла РФ-ни экономиканы айнытыу министрини орунбасары Сергей Назаров бу кюнледе бардыргъан кенгешде жыл узуну ишлеп тургъан «Элбрус» турист-рекреация комплексни айнытыуну онглары сюзюлгендиле.

Республиканы Промышленность, энергетика эм сатыу-алыу министерствосуну алгъаракълада болгъан коллегиясында аны былтыргъы ишини эмда быйылгъа борчларыны юсюнден жик-жиги бла айтылгъан эди: ала бла жыйылгъанланы министр Шамиль Ахубеков шагъырейлендиргенди. Андан сора да, коллегиягъа отлукъ-энергетика комплексден талай предприятияны келечилери къатышхан эдиле. Ала да предприятияларыны ишлерини юсюнден къысха айтхандыла.

Къабарты-Малкъарны, РФ-ни Экономиканы айнытыу министерствосуну эмда «Ростех» къырал корпорациягъа кирген «Элбрусну тау магъадан комбинатыны» (ЭГРК) арасында озгъан айны ахыр кюнлеринде келишим (СЗПК) этилген эди. Сёз анда Тырныауузда тау-магъадан комбинатны къураргъа ахча бла къошулургъа себеплик этиуню эмда инвестицияланы къоруулауну юсюнден барады, деп билдиргендиле республиканы Экономиканы айнытыу министерствосундан.

Былтыр Къабарты-Малкъарда абери сатып алгъанла эмда жумушла ючюн ахча тёлегенле банк карточкаланы 47,4 кере хайырланнгандыла. Буруннгу жыл бла тенглешдиргенде, бу кёрюмдю беш процентге кёбейгенди. Ахча бла алып тергегенде уа, ол жети процент къошуп, 35,9 миллиард сомгъа жетгенди, деп билдиргендиле Россейни Миллет банкыны республикада бёлюмюню пресс-службасындан.

Кёп болмай  КъМКъу-ну -излем жаны бла проректоруну къуллугъун толтургъан  Светлана Хаширова, университетни атындан Москвада копазитле бла байламлы онунчу битеуроссей форумгъа къатышханды. Ол «Жангы излемле бла амалланы кезиуюнде композитле бла байламлы бёлюмню айнытыу» темагъа жораланнганды. 

Кёп болмай Москвада бардырылгъан Россельхозбанкны правленини кенгертилген жыйылыуунда озгъан жылны кёрюмдюлерине къарагъандыла.  Анда финанс учрежденияны Къабарты-Малкъарда бёлюмю адамланы жумушларын толтуруу бла битеу регион бёлюмлени арасында эм игилени санына чыкъгъанды.