Экономика

Кёп болмай  КъМР-ни Транспорт эмда жол мюлк министерствосуну жамауат советини таматасы Ануарбий Суншев жол мюлк управленияны келечилери бла бирге Терк бла Май районлада тынгылы ремонт ишле къалай баргъанларына къарагъандыла, деп билдириледи ведомствону пресс-службасындан.    

Саулай къыралда гитче эмда орта предпринимательство бла кюрешгенледен 113,6 минги ариулукъ индустрияда къармашадыла. Бу бёлюмге иги эс бурадыла ала. Быйыл ал тёрт айны ичинде аллай 30 минг жангы предприятие ачылгъанды. 

Быйыл февральда бла март айда къыралыбызны къыбыла регионларында былтыр бу кезиуледен эсе аслам адам солугъанды. Къонакъланы саны бегирекда Краснодар крайда эмда Шимал Кавказда тау курортлада кёп болгъанды. Жолла айный баргъаны себепли къысха кезиуню солургъа сюйгенле да асламдыла.

Россейни Ара банкыны Къабарты-Малкъарда бёлюмю быйыл республикада март айда инфляцияны ёлчемин тергеп, аны тарихлери бла шагъырейлендиргенди.

Быйыл биринчи кварталда саулай Россейде тергегенде, гитче эмда орта предприятияланы саны 6,7 миллиондан атлагъанды. Ол ары дери болмагъанча аллай уллу кёрюмдюдю, тийишли тизмени жарашдырып башлагъанлы (2016 жылдан бери) бир кере да эсепге тюшмегенди, дегендиле Къабарты-Малкъарны Экономиканы айнытыу министерствосунда.

Быйылдан башлап, эл ипотеканы энди жаланда элледе агропромышленность бёлюмде ишлегенле алаллыкъдыла. Кредит келишимге къол салгъандан сора быллай жерледе инсан,  эм азындан,  беш жыл урунургъа борчлуду. Сёз мында Эл мюлк министерствогъа, Росрыболовствогъа эмда Россельхознадзоргъа бойсуннган организацияланы эмда АПК-да предпринимательство бла кюрешиуню юслеринден барады.

Быйыл февральда Къабарты-Малкъарда инфляция, сау жылгъа алып тергегенде кёбейип, 9,8 процентге жетгенди. РФ-ни Банкында аны предпринимательлени эмда товарла бла жалчытыучуланы къоранчлары кёбейгенинден кёредиле.

Элбрус муниципал районну тийресинде бир ненча кооператив ишлейди: СПК «Быллым», «Агропремиум», иеликни гитче формлары. 25 фермер мюлк, эм жамауат  2443 энчи юйюнде тутхан мюлк да.  Белгилисича, эл мюлкню эм айныгъан тюрлюсю  малчылыкъды. Районну эл мюлкюнде быйылгъы  жылны аллына 15,536 уллу мал эсепленнгенди.

МСП Корпорацияны болушлугъу (гарантияла берип) бла  саулай Россейде  гитче эмда орта бизнес бла кюрешгенле былтыр 1,18 триллион сом къоллу болгъандыла. Буруннгу жыл бла тенглешдиргенде,  ол сегиз процент къошханды, дегендиле КъМР-ни Экономиканы айнытыу министерствосунда.

Кёп фатарлы юйлени ишлеу бла кюрешген организацияла жангы алыучула излер умутда банкла бла бирге тюрлю-тюрлю акцияла къураргъа кюрешедиле. Аланы саны кёпдю, хар бирин да тинтип, ангылатып турургъа онг жокъду. Алай ала сизни къалай онгдурургъа сюйселе да, бу затлагъа уа эс бурмай къоймагъыз: