Экономика

Къабарты-Малкъарда аш-азыкъ чыгъарыучу эмда жарашдырыучу предприятияла быйыл ноябрьге дери иги кесек продукция чыгъаргъандыла. Шимал-Кавказ статистика ведомствону тергеулерине кёре, ол былтырдан эсе кёбюрек окъуна болгъанды, дегендиле республиканы Экономиканы айнытыу министерствосунда.

Быйыл регионлада "Къоркъуусуз эм тынгылы автомобиль жолла" миллет проектге кёре 2 минг километр чакълы бир  жоллагъа тынгылы ремонт этилгенди эм сетьлени да  жангыртхандыла.

Федерал налог службаны тинтиулерине кёре, Къабарты-Малкъарда кеслери иш къурап къармашханланы саны бу айны биринчисине 80,8 мингнге жетгенди. аладан 78,4 минги инсанладыла, къалгъан кесеги уа энчи предпринимательледиле, дегендиле КъМР-ни «Мени бизнесим» арасында.

Къырал статистика ведомствону Шимал Кавказда тергеулерине кёре, Къабарты-Малкъарда гитче предприятияла (эм гитчелени санамай) быйыл ал тогъуз айны ичинде кеслерини ишлерине 905,1 миллион сом инвестицияла этгендиле. Былтырны ол кезиую бла тенглешдиргенде,  ёсюм 40 процентге жетгенди. 

Къабарты-Малкъарда гитче эмда орта предпринимательство субъектлени саны бу айны аллына 22,4 мингнге жетгенди. Аладан 16,6 минги энчи предпринимательледиле, къалгъанлары уа предприятияла бла организацияладыла. Былтырны ол кезиую бла тенглешдиргенде,  ёсюм 6,9 процент болгъанды, деп билдиргендиле «Мени бизнесим» арадан.

Быйыл Къабарты-Малкъарда къагъыт бла къагъытдан абериле  77,8 минг квадрат метр чакълы чыгъарылгъанды, ол былтыр бу заман бла тенглешдиргенде 30 процентге кёпдю. 

 «Россети Северный Кавказ» - «Каббалкэнерго» биригиу быйыл сегиз айгъа  абонентлени ток бла 100 процентге жалчытханды. Сагъынылгъан кезиуде  хайырланылгъан ток ючюн 177,6   миллион сом тёлегенди. Былтыр бу заман бла тенглешдиргенде, ол 21 миллион сомгъа  кёпдю.

КъМР-ни Транспорт эмда жол мюлк министерствосундан билдиргенлерича, алты жылны ичинде республикада жолланы  1811 километр чакълы  бири  мардалагъа келиширча болгъанды.

Шимал Кавказны таулада эмда тау этекледе терек бахчачылыкъны илму-тинтиу институту, эл мюлк товарла чыгъарыучулагъа себеплик этиуде, Къабарты-Малкъарны Эл мюлк министерствосу бла байламлыкъ жюрютеди. Сёз мында терек бахчачылыкъда къармашханланы онгдурууну юсюнден барады, дегенди институтну башчысыны орунбасары Баккуланы Жамал.

Бизни къыралда тиширыу предпринимательство арт кезиуледе аз-аздан ёсюм кёргюзтюп барады. Ахыр жыллада энчи предприниматель эмда кеслери иш къурап къармашхан тиширыуланы саны селеймейди, ол ала бизнесде алгъан жерни магъанасын кёргюзтеди. Ала жумушла бериуню кёп тюрлюлери бла кюрешедиле, сатыу-алыуну бардырадыла, юс кийимле тигедиле, туризмни айнытадыла.