Экономика факультетлени башчылары тюбешгендиле

Къабарты-Малкъар къырал аграр университетни «Экономика эм управление» факультетини деканы Николай Коков аграр вузланы быллай бёлюмлерини башчыларыны битеуроссей семинар-кенгешине къатышханды. Ол Къобанны къырал аграр университетинде алгъаракълада ётгенди, дегендиле КъМКъАУ-ну пресс-службасында.

Семинарны «Агрообразование» деген Ассоциация къурагъанды. Анга РФ-ни Эл мюлк эмда Билим бериу министерстволаны, аграр вузланы эмда илму-излем институтланы, Россейден эмда тыш къыралладан отуздан артыкъ быллай факультетлени башчылары, бу бёлюмде ишлеген экспертле да къатышхандыла.

КубГАУ-ну ректору, РАН-ны академиги Александр Трубилин къонакъланы ол кеси башчылыкъ этген вузну тарыхы бла шагъырейлендиргенди. Айтыр заты уа кёп эди дерчады: университет быйыл 100 жыллыгъын белгилейди.

Семинарны пленар кенгешинде «Аграр экономика» эмда «Агроменеджмент» бёлюмледе усталыкъланы ышанларын тохташдырыу жаны бла профессионал стандартланы кийириуню юсюнден сёлешгендиле. Дагъыда тийишли проектлени туура этгендиле, аграр жаны бла экономика билим бериуню айнытыу жолларын сюзгендиле.

Жыйылыуда дагъыда билим бериуге эмда эл мюлкге цифралы технологияланы сингдириуню юсюнден сагъынылгъанды. Ол а: цифралы компетенцияла, «Цифралы агрономия» деген профильни къурау, эл мюлкню тюрлендириу. Андан сора да, онлайн халда окъутууда чыкъгъан чурумланы сюзгендиле, аладан къутулур амалланы туура этгендиле.