Кесибизде чыгъарылгъан урлукълагъа кёчерге

Россейни эл мюлк министри Дмитрий Патрушев министерствону оператив штабыны кезиулю кенгешин бардыргъанды. Анда сабан ишле къалай бардырылгъанларыны, аграрийлеге къыралдан болушлукъ бериуню, аш-азыкъ рынокда багъаланы юслеринден да сёлешиннгенди.

Министр айтханнга кёре, бу кюнлеге сабанланы 95 процентинден жыйылгъанды мирзеу. Ол а 152 миллион тонна болады. Аграрийле нартюхню, чёплеуню, бал чюгюндюрню да къазауатда жыя турадыла. Дагъыда 17,5 миллион гектарда кюзлюклени урлукъларын сепгендиле. Жыйылыуда айтылгъаныча, аланы 95 проценти тап халдадыла.

Эл мюлкде къармашханлагъа себеплик этиуню юсюнден айта, Дмитрий Патрушев мирзеу ёсдюрюу эмда сатыу бла байламлы субсидияланы алагъа теркирек жетдирирге кереклисин чертгенди. Дагъыда Правительствону 406-чы номерли бегимине тюрлениуле кийириу жаны бла проект кёргюзтюлгенди. Ол кеси да мирзеу чыгъарыучулагъа, тирликлерин Ара эмда Приволжск федерал округладан темир жол транспорт бла ташыу ючюн себеплик этиу бла байламлыды.

Алай бла энди Дагъыстаннга, Краснодар крайгъа, Астрахань, Калининград, Ленинград, Мурманск эмда Ростов областьлагъа, сора дагъыда Санкт-Петербургга ташыргъа амал чыгъарыкъды. Ол жумушлагъа 800 миллион сом бёлюрге дейдиле. Аны хайырындан бир тонна продукция ючюн 1-1,4 минг сом субсидия берилирге эмда экспортха себеплик этилирге да боллукъду. Быллай амал излегенледен министерство заявкала алып башларгъа хазырды.

Урлукъчулукъну айнытыугъа кенгешде энчи эс бурулгъанды. Министр айтханнга кёре, жууукъ кезиуледе бу сфераны иги да айнытыргъа керекди.

Бизде селекцияны тирилтирча талай онгдуруу амалла жарашдырылгъандыла. Дагъыда тыш къыралладан урлукъ ташыугъа бираз чек салыргъа дейдиле. Регионла бизни къыралда чыгъарылгъан урлукъладан келир жылда неллай бир алыргъа умут этгенлерин бу айны ахырына дери билдирирге борчлудула. Ала дагъыда урлукъчулукъ жаны бла энчи тийреле къурауну къайгъысын этерге керекдиле. Министр айтханыча, селекция иш жаланда ма алай боллукъду къыйматлы.

Улбашланы Мурат хазырлагъанды.