КъМР-ни Башчысы республикада федерал жолланы ишлегенлеге ыразылыгъын билдиргенди

Пятигорск шахарда КъМР-ни Башчысы Казбек Коковну Упрдор «Кавказ» акционер обществону таматасы Александр Лукашук бла ишчи тюбешиую болгъанды. Аны кезиуюнде юсюбюздеги жылны ал кёрюмдюлери сюзюлгендиле, 2024 жылгъа дери тамамланырыкъ ишлеге къарагъандыла. Тюбешиуге дагъыда  Упрдор «Кавказны» таматасыны биринчи орунбасары Анзор Зубкаев, КъМР-ни транспорт эм жол мюлк министри Аслан Дышеков къатышхандыла.  

Казбек Коков жол мюлк управленияны кюн сайын белгиленнген объетледе уруннган ишчилерине, аны толусунлай коллективине эм оноучу къауумуна ыразылыгъын билдиргенди. КъМР-ни Башчысы федерал жоллада къоркъуусузлукъ жаны бла тюрлениуле иги жанына танг болгъанларын чертгенди.   

Александр Лукашукну айтханына кёре, бюгюнлюкде тынгылы ремонт битеу да 23 километр участкада бардырылады. Башхача айтханда, Ставрополь крайны чегинден тебиреп, Куба -Табагъа дери эм Аргудандан Шимал-Осетияны чегине жетгинчи. Дагъыда уллу эс «Кавказ» автомобиль жолдача эм республиканы башха белгили туристле кёп жюрюген жерлериндеча, кёпюрлени халларын тохташдырылгъан мардалагъа кёре жетдирирге бурулады».

Жолланы кенгликлери  тёрт автомашина барырча этилгенли, кёпюрлеге да ауурлукъ ёсе барады. Ол себепден алагъа тынгылы ремонт этгенде шёндюгюлю технологияланы хайырланыуну себеплиги бла техника халлары игилениледи.

 Бюгюнлюкге болжалдан алгъа Куба-Табада бла Прохладный-Баксан-Элбрус автомобиль жолда болгъан кёпюрлени болжалындан эсе алгъа хайырланыргъа берилгенди.  Дагъыда юч кёпюрге жылны аягъына тынгылы ремонт этилип бошаллыкъды. Ала «Кавказ» автомобиль жолда Чегем эм Лескен сууланы юслери бла баргъан кёпюрле эм Аушигерни чеклеринде Урвань-Огъары Малкъар-Уштулу жолда Хеу сууну юсюнде орналгъан кёпюрледиле.

2023 жылгъа Бахсан шахаргъа кирген жерде сууну юсю бла баргъан жерде 120 метр узунлугъу болгъан кёпюр хайырланыргъа берилликди. 2024жылгъа Эски Черек элде Черек сууну юсю бла узунлугъу 135 метр болгъан кёпюрню ремонту бошаллыкъды. Шендю Приэльбрусиягъа баргъан жолда Адыр-Сууда кёпюрню жангырта турадыла, аны узунлугъу 78 метр болгъанды. 2022 жылны озгъан тогъуз айыны ичине 2017 жылны кезиую бла тенглешдиргенде жоллада болгъан автоаварияланы саны 41 процентге азайгъанды. 2024 жылны ахырына дери жоллада къоркъуусузлукъну жалчытыу жаны бла мадарланы этиу бла байламлы адамла жолну бир жанындан башха жанына ётген беш жер тохташдырылгъан мардалагъа кёре тапландырыллыкъды.

Андан сора алты участокда узунлугъу 3,5 километр болгъан жерде жолчула чыракъла жанарча этерикдиле. Ол тийреледе жолланы жанларына темирден чалдишле сюерикдиле эм тюрлю-тюрлю белгиле саллыкъдыла. 

Быйылгъы жылгъа тамамланыргъа керекли битеу белгиленнген ишле болжалындан эсе алгъа битерикдиле. Белгилерчады, бек уллу эм магъаналы жумуш тынгылы этилгенди, республиканы ичинде Р-217 «Кавказ» автомобиль жолну асламысында тёрт автомашина жюрюрча онгла къуралгъандыла.

Болдургъан жетишимлери, бийик профессионал усталыкълары эм тынгылы ишлегенлери ючюн Казбек Коков Упрдор «Кавказ» биригиуню оноучуларына эм ишчилерине Къабарты-Малкъар Республика къуралгъанлы 100 жыл болгъаны бла байламлы эсде къаллыкъ майдалланы, КъМР-ни Башчысыны ырызылыкъ къагъытын, республиканы правительствосуну сыйлы грамоталарын бергенди, деп билдиргендиле КъМР-ни Башчысыны бла Правительствосуну пресс-службасындан.