Къурулуш бла байламлы соруулагъа къарагъандыла

КъМР-ни Башчысы Казбек Коков капитал къурулуш соруула бла байламлы оператив штабны жыйылыуун бардыргъанды. Жыйылыуну ишине КъМР-ни Правительствосуну Председатели Мусукланы Алий, аны биринчи орунбасары Муаед Кунижев,  КъМР-ни къурулуш эмда жашау журт-коммунал мюлк министири Алим Бербеков, КъМР-ни транспорт эм жол мюлк министри Аслан Дышеков къатышхандыла.

Анда къурулуш, жангыртыу жаны бла ишле къалай бардырылгъанларына эм магъаналы социал объектлеге тынгылы ремонт этиу не халда болгъанына къарагъандыла. Битеу ишле миллет, федерал эм регионал проектлени бла программаланы чеклеринде бардырыладыла.

 Жыйылыуда 2023-2025 жыллада капитал къурулуш эм тынгылы ремонт ишлени ёлчемини юсюнден планнга да къаралгъанды. «Бек башы-социал бёлюмге къайгъырыуду, башхача айтханда бизни эллерибизде  билим бериуню, маданиятны, спортну айнытыуду. Аны бла бирге ол жерледе тапландырыу ишлени бардырыргъа керекди, ол санда коммунал мюлкде бла жолланы ишлеуге уллу эс буруп. Битеу ол ишлени комплексли халда эм инсанланы бизге жазгъан тилеклерине кёре бардырыргъа тийишлиди», - деп чертгенди Казбек Коков. Аны юсюнден КъМР-ни Башчысыны бла Правительствосуну пресс-службасы билдиреди.

Бизни корр.