Аграр илмуну жетишимлери иги хайыр келтиредиле

«Россельхозараны» Къабарты-Малкъарда бёлюмю битимлени биологиялы амалла бла къоруулагъан затланы чыгъарыу жаны бла иги къармашады. Жыл сайын аны районлада бёлюмлери къурагъан сабанлада абериле ёсдюрюп, кеслери жарашдыргъан препаратла (Гумат +7 «Саулукълу тирлик» Псевдобактерин-2, Ж) эмда энтомофагла къалай «ишлегенлерин» сынап кёредиле.

Энтомофаг деп энчи къурт-къумурсхалагъа айтадыла. Ала адамгъа хайырлы битимлеге заран салмайдыла, алай этген башха къуртланы уа къырып къоймайдыла. Бёлюмде бу затланы Габробракон бла Трихограмма деген тюрлюлерин ёсдюредиле.

Быллай сабанланы битеулю ёлчеми 111,5 гектар болады, аланы специалистле республиканы бар районларында къурагъандыла. Ол жерледе тюрлю-тюрлю битимле эмда жемишле ёседиле.

Бу ишни чеклеринде Гумат +7 «Саулукълу тирлик» агрохимикатны бла Псевдобактерин-2, Ж биопрепаратны хайырларын мирзеулюк, кёп жыллыкъ эмда техникалы билимлени, сора дагъыда тахта кёгетлени юслеринде сынап кёргендиле. Талай районда нартюх сабанлада ол сагъынылгъан къуртланы да хайырланнгандыла.

Кюнню халы быйыл терк-терк тюрлене тургъанды, дегендиле бу Арада. Бирде къургъакълыкъ бола, бирде уа жауунлу кюнле келе - эл мюлкге артыкъ уллу себеплик этмегенди. Къыш хазна къарлы болмагъанды, жумушакъ, жылы эди. Жаз башы келгени бла уа жауунла башланнгандыла. Хауаны жылыуу орталыкъ кёрюмдюледен азыракъ эди (+8 +18), бирде уа +26 градусха дери да кётюрюлюп тургъанды. Ол бары да битимлени апчытханды.

Май айда агрометеорология болумну хатасы жокъ эди, бир-бир кюнле мылылы, сууугъуракъ болгъанлыкъгъа да. Жауунла терк-терк жауа, жер да къургъакъсымай кёп тургъанды. Алай ёзенде районлагъа уа ол иги болгъанды. Жай а къургъакъ эди асламысында.

Алай бла ноябрьни ал кюнлеринде специалистле ол сабанланы тинтип чыкъгъандыла. Сагъынылгъан биопрепаратла бла агрохимикатла хайырланылгъан жерледе будайны, арпаны эмда сояны (+22%), тахта кёгетлени (+18%), сора дагъыда жемишлени (+15%) тирликлери асламыракъ болгъанды. Габробакон (70-75%) бла Трихограмма (65%) да иги хайыр кёргюзтгендиле.

«Россельхозараны» специалистлери эл мюлк товарла чыгъарыучулагъа бу ишни эсеплерине кёре рекомендацияла жарашдыргъандыла.