Аналыкъ капиталны – турмушну игилендириуге

2023 жылда Къабарты-Малкъарда 1795 юйюр аналыкъ капиталны жашау-турмуш болумларын игилендириуге хайырланнгандыла. Аны бла байламлы Социал фонд юй ишлеген организацияланы, банкланы, жашау журт кооперативлени эм фатар неда юй сатхан адамланы счётларына бир миллиард сомдан артыкъ ахча кёчюргенди.

 Аналыкъ капиталгъа юйюрлени асламысы жашау-турмуш болумларын игилендирирге излейдиле. Аны болушлугъу бла жарайды:

- энди ишлене тургъан кёп юйде фатарны алыргъа неда аны багъасыны кесегин тёлерге;

- энчи иели юйню ишлерге неда аны жангыртыргъа;

 - юйню жангыртыугъа къоратылгъан ахчаны толусунлай неда кесегин къайтарыргъа;

 - фатарны сатып алыугъа берилген кредитни биринчи тёлеуюне;

- фатарны ипотекагъа алгъанда, энчи юйню ишлер ючюн кредитни биринчи тёлеуюню жабаргъа;

- юйню ишлеуге аналыкъ капитал берилгинчи алыннган кредитни толусунлай неда процентлерин тёлерге;

- инсан жашау журт, жашау журт-къурулуш кооперативге кире эсе, паевый неда башха тёлеуюн этерге.

Сертификатны фатарны неда юйню кредитсиз алыр ючюн хайырланыргъа сюйгенлеге сабийге юч жылы толгъунчугъа дери сакъларгъа тюшерикди. Аны юсюнден заявленияны МФЦ-лада, Социал фондну клиент службасында неда къырал жумушланы порталында толтурургъа боллукъду. Кредит алына эсе, ол болжалны сакъларгъа керек тюйюлдю, аналыкъ капиталны хайырланыуну юсюнден заявленияны банкны кесинде жазаргъа жарарыкъды, адамлагъа тынчлыкъгъа Социал фонд аслам кредит организацияла бла байламлыкъла жюрютюуню юсюнден келишимле тауусханды.