Сабийге къарагъан кезиуде – пенсия балла

Россейни Пенсия фонду тиширыугъа пенсиясын тохташдыргъан кезиуде сабийлеге къарагъан кезиуюн да санайды, ол ананы урунуу стажына киреди. Аны ючюн ЗАГС-дан балала туугъанларыны юсюнден кёрюмдюле, аналыкъ капиталны хайырланыу неда Президентни указларына кёре берилген тёлеулени юслеринден информация алынады.

Тиширыулагъа сабийлеге къарагъан жыллары лицевой счётларына автомат халда къошулгъанларыны хайырындан пенсияла жангыз бир заявлениядан сора тохташдырыладыла, аладан клиент службалагъа барырлары неда шагъатлыкъ этген башха документлени берирлери изленмейди, деп билдиредиле фондну регионда бёлюмюнден.

Алай бла анагъа бала туугъандан сора анга  1,5 жыл толгъунчугъа дери къарагъан кезиуюне 2,7 пенсия коэффициент бериледи. Экинчи сабий бла тургъан заманына балла кёбюрекдиле – 5,4. Ючюнчю неда тёртюнчю балагъа къарагъан кезиу да жыл урунуу стажгъа 1,5 жыл къошады, пенсия коэффициентле уа 8,1 боладыла. Тёрт сабий ёсдюрген ана 24,3 коэффициентге дери жыяллыкъды, бюгюнлюкде жыл саннга кёре пенсиягъа чыгъаргъа ол тамамды.

Сабий туугъанындан сора ана ишин андан ары бардырса, пенсиясын тергегенде, эм файдалы стаж бла коэффициентле (сабийге къарагъан неда уруннган) саналлыкъдыла. Аны бла бирге балагъа къарагъан кезиу анагъа саналмагъан эсе, атаны балларына къошулургъа боллукъду.