Сакълыкъ хатагъа келтирмез

Бу кюнледе Россейни МВД-ны Элбрус районда автоинспекторлары, муниципалитетни келечилери эм журналистле да къатышып велосипедледе жюрюгенлеге къоркъуусузлукъну жорукъларындан билдирирча акция бардыргъандыла.

Аны чеклеринде жаяу жюрюгенлеге, жолда сакъ болургъа, уллу кёллюлюк этмезге, жолдан жаланда белгиленнген жерледе ётерге чакъыргъандыла. Полициячыла алагъа жорукъланы бир къауумундан эслерине салгъандыла, ол санда билмеген жерлеринде эм къыйын участокла бютюн эслирек болурларын чертгендиле. 

Жай кезиуде велосипедледе жюрюгенлени танг кесеги сабийледиле. Аны ючюн алагъа да аслам эс бурулгъанды. Ол санда «зебралада» эм башха жерледе да жолну жаяу ётерге, ашыкъмазгъа кереклерин къаты айтхандыла. Районну пресс-службасыны эм газетини келечилери уа инсанлагъа  кечегиде сакъ болургъа, энчи жылтырауукъланы хайырлансала иги боллугъун да билдиргендиле эм респондетлени барына да жабышдырыучуланы саугъалагъандыла.

Абаданла эм гитчеле да быллай магъаналы акцияны бардыргъанлагъа ыразылыкъларын айтхандыла эм аны кезиуюнде билгенлерин мындан арысында тири хайырланырыкъларын къошуп ышандыргъандыла.