«Къоркъуусуз бау» кёплени жанларын сакъларгъа болушханды

Республиканы къырал автоинспекторлары «Къоркъуусуз бау» рейдни эсеплерин чыгъаргъандыла. Право низамны сакълаучула 1,5 мингден аслам бузукълукъну ачыкълагъандыла. 

Алай бла республиканы жолларында болгъан тинтиуледен сора, машинада къоркъуусузлукъ бауну хайырланмагъан 1133 водитель бла 16 пассажир административ жууапха тартылгъандыла. Сабийлени къоркъуусузлукъларына салыннган излемлени бузгъанлагъа уа 279 эсгертиу этилгенди. 

Полициячыла, федерал законлагъа тийишлиликде, машинада къоркъуусузлукъ бауну такъмагъаннга тазир салыннганын эсгертедиле. Ол минг сомду. Сабийле бла байламлы излемлеге бузукълукъла ючюн а андан да кёп тёлерге тюшерикди – юч минг сом. 

- Къоркъуусуз бауну такъгъанны хайыры болгъанына даулашырча тюйюлдю, аварияны кезиуюнде ол кёп адамлагъа жанларын сакъларгъа болушханды. Болсада бирле жорукъланы билип бузадыла, башхала  унутуп къойгъанма, деген сылтауну айтадыла. Аны керексизге санагъанла да бардыла,-дегендиле бизге УГИБДД-дан.

Болсада инспекторла водительлени кеслерини эмда биргелерине келген адамланы саулукълары ючюн  жууаплы болургъа, сабийлени къоркъуусузлукъларын жалчытыргъа, жолда жюрюуню жорукъларын сакъларгъа чакъырадыла. «Къоркъуусуз бауну сиз административ жууапха тартылмаз ючюн такъмайсыз, ол кесигизни эм жолда жюрюуге къатышханланы саулукъларын сакъларгъа болушады»,-деп къошхандыла право низамны сакълаучула.