Энчи билдириулени жайгъанланы – административ жууаплылыкъгъа

2023 жылны апрелинде Владимир Путин реестрде болгъан фатарланы неда юйлени юслеринден (ЕГРН) данныйлени сатыу, жалгъан сайтланы къурау ючюн административ жууаплылыкъны къатыландырыуну юсюнден законнга къол салгъанды. 9 майда ол кючюне киргенди. Бузукълукъ этгенлени не сакълагъаныны юсюнден «Роскадастрны» регионда бёлюмюнде айтхандыла.

 
Алай бла къырал реестрден данныйлени алагъа эркинликлери болмагъанлагъа сатхан къуллукъчулагъа, организациялагъа бла гражданлагъа тазир тёлерге тюшерикди. Жууапха Интернетде керти сайтлагъа ушашдырылып жарашдырылгъан сайтланы, юйлени юслеринден данныйлени урлагъан программаланы бла мобильный приложенияланы къурагъанла да тартыллыкъдыла. «Роскадастрны» регионда бёлюмюню башчысы Анна Тонконог билдиргенича, бу закон адамланы эркинликлерин сакълар, аланы къырал власть органлагъа ышаныулукъларын ёсдюрюр мурат бла жарашдырылгъанды. Аны бла бирге ол Росреестр жалчытхан къырал жумушланы качествосун ёсдюреди, мюлк бла байламлы сатыу-алыу ишлени бардыргъанда адамланы къоруулайды.

Терсленнгенле административ жууаплылыкъгъа аланы ишлеринде уголовный бузукълукъла жокъ эселе тартыллыкъдыла. Гражданлагъа тазир 15-25 минг, къуллукъчулагъа - 40-50 минг боллукъду. Юридический лицоча эсепге турмагъан предпринимательле 80-100 минг тёлерикдиле, юридический лицола уа – 350-400 минг. Быллай бузукълукъну къайтарып этгенлеге тазирле ёсерикдиле: гражданлагъа – 40-50 минг, къуллукъчулагъа – 80-100 минг, юридический лицоча эсепге турмагъан предпринимательле 150-200 минг тёлерикдиле, юридический лицола уа – 500-600 минг.