Финанс жумушланы юслеринден тюзюн жазаргъа керекди

Монополиялагъа къажау федерал службаны Къабарты-Малкъарда управлениясына (УФАС) Россей Федерацияны Ара банкыны Къыбыла бёлюмюнден келген билдириуде «Налэкспресс» организация реклама бла байламлы законодательствогъа бузукълукъ этгенини юсюнден айтыла эди.

Иш а былай болгъанды. Ол Нальчикде Горького эм Толстого орамла бирге къошулгъан жерде юйню къабыргъасына реклама баннер тагъып, анда «ПТС-ни залогга къой да,  ёнкючге 100 минг сомгъа дери ал. Автомашинаны кюннге 0,33 процентге (алты айгъа дери) залогга салып, ахча алыргъа боллукъду. Машина уа кесигизде турлукъду», деп жазгъанды. Баннер тагъылгъан жерде эшикни къатында энтта да бир реклама билдириу бар эди: «Жашауда болгъан не тюрлю жумушха да займла». Аны ким бергенини юсюнден а жукъ да жазылмагъанды.

«Рекламаны юсюнден» федерал законну ючюнчю статьясыны биринчи кесегине тийишлиликде, абериге адамлада сейир къозгъагъан, аны рынокга чыгъаргъан информация – ол рекламады. Къайда, къалай, не амал бла да жазылсын – башхасы жокъду. Бу законну 28 –чи статьясыны биринчи кесегинде айтылгъаннга кёре уа, банк, страховой эмда башха финанс жумушланы эмда ишлени рекламасында аны ким тамамлагъаны да жазылыргъа керекди. Ол организация эсе – аны да атын. Айтылгъаннга кёре, башында сагъынылгъан реклама терсди. Аны жарашдыргъаннга УФАС административ иш ачханды эмда тазир салгъанды.