Башхаланы адет-тёрелери

Италиячыла ресторанлада, кафеледе шапагъа нохтабау узатмайдыла, асыры къызгъанчдан, деген оюмгъа келгенди Trip Advisor компания. Ол европалы къыраллада, АБШ-да, Бразилияда, Россейде да соруула бардырып, къайсы къыралда ашханалада къаллай бир нохтабау къойгъанларын билирге сюйгенди.

Ачыкъланнганыча, италиячыла барысындан да къызгъанч болуп чыкъгъандыла. Аланы жолоучулукъда болгъанларыны жаланда 11 проценти саугъалаучудула ахча бла шапаланы.  Ала кеслери уа къызгъанчдан этмейбиз алай, ахчаны ары бла бери атып айланыргъа керек тюйюлдю,дейдиле.

Алай французлула да алай чомарт тюйюлдюле.  Сорулгъанланы жаланда 15 проценти айтханды саугъалау халда ахчаны тийишлисинден эсе кёбюрек бергенлерин. Сорууну бардыргъан компания аны сылтауларын бирине бу шартны санайдыла - ресторанлада, кафеледе,къонакъ юйледе ишлегенле кеслерине алайсыз да аз ахча тюшюрмейдиле.

Нохтабау этиу жаны бла америкалыла бек халаллагъа саналадыла. Аладан сора немислиле бла бразилиячыла барадыла. Россейли туристле уа тизмени ортасындадыла. Лазурный тенгиз жагъада къонакъ юйлени талайыны иеси Мишель Чанны оюмуна кёре, россейлиле чомартлыкълары бла кёплени озадыла.