Муслийманла дарманны Къуранда излерге борчлудула

Хыйны  этгенле алагъа ийнанып, башхалагъа аманлыкъла излеп, хыйнычылагъа  жюрюгенле  да арт кезиуде кёп болуп барадыла. Социальный сетьледе   хыйны бла кюрешгенлени тутханларыны, тюйгенлерини юслеринден  видеола кезиуден-кезиуге  басмалана, кёп оюмла, даулашла туудурадыла.  

Исламда быллай иш бла кюрешиу уллу харамладан бириди. Алай нек   болгъанын, хыйны этгенле, алагъа ийнаннганла  да къаллай жууап тутарыкъларын Хасания элни иймамы Мисирланы Тимур айтады:

 - Хыйны бла ким кюреше эсе да, ол жаханимден чыгъарыкъ тюйюлдю.   Ол кяфырды.   Хыйнычыгъа Аллах налат салады.  Мухаммад файгъамбар, Аллахны саламы анга болсун, былай дегенди: «Астрология билим алгъан адам хыйныны бир бёлюмюне юйренеди. Адам  астрология бла не къадар кёп кюрешсе, ол хыйныгъа кирип барады». (Ахмад).

Энтта бир хадисде былай айтылады. Аллах жаратханды жулдузланы юч зат ючюн. Биринчиси – ала кёкню ариу этедиле. Алагъа къарап,  Аллахны эсинге тюшюресе, аны къарыуун, деменгилилигин, кючюн, ырахматлыгъын, игилигин ангылайса, анга махтаула саласа. Экинчиси – жолоучулагъа жарыкълыкъ берип, алагъа жол кёргюзтюледи.   Ючюнчюсю уа –шайтанланы урур ючюн. Шайтанла бир бирлерини боюнларына минип, мёлеклени хапарларына тынгылайдыла. Алай аланы мёлекле кёрселе, жулдузла бла уруп агъызадыла. Бу юч затдан къалгъан жумушлада жулдузла бла кюрешгенле терс жолдадыла. Бу хадисни Бухари билдиргенди.

Жулдузлагъа къарап, адам башханы жашауун, эрге къачан чыгъарыгъын, къаллай бир сабийи боллугъун, алача башха затларын  билаллыкъ тюйюлдю. Ол алдагъан этеди.  Арап тилде аллай бла кюрешгенлеге «ассихар» дейдиле. Аны магъанасы - керти боллукъ затны тюрлендирирге сюйген. Башхача айтханда, Аллах берген къадарны харамлыкъ бла, гюнях бла алышыргъа излеу. Ол а адам Аллахны буйругъуна, андан келген сынаулагъа  ыразы болмагъанын билдиреди.

Мухаммат файгъамбар, Аллахны саламы анга болсун, айтханды: «Ким жипни тюйюмчек этип, анга тюкюрген эсе, ол хыйны этди. Хыйнычылыкъ - ширкди»  (Тирмизи). Тюйюмчек этип, юсюне тюкюрюу, юфгюрюу – хыйныды. Аллайны кёрген эсегиз, андан кери туругъуз, ол сизге  хайыр келтирмез.

Дууа жазама деп, адамланы алдап ашыргъанларын а билмеймисиз? Эй, муслийманла, сагъыш этигиз! Хыйнычы юйюнгде бир зат барды, ол къыйнайды, аманлыкъла андан башланнгандыла  деп алдайды. Сора кеси къойгъанны тапханча этип, махтау алады, энтта аны бу юйге келирге  жол ачады. Алдау бла ол  файда къоллу болады. 

Хыйны салып, адамны  башын хайран этип, шашдырыргъа боллукъдула, ауруу бередиле,  жашауу къуралмазча, адам юйленмезча, сабийи болмазча аманлыкъла тежейдиле.   Адамны жюрегине жарсыуланы къошадыла – саулугъуна, ырысхысына.  Алай бла бу дуниягъа керексиз артыкъ эс бурурларын  излейдиле. Ол а жарамайды, Аллахутала берген къадаргъа тарыкъмазгъа  юйретеди бизни ислам.

Бу адамла жинле бла ишлейдиле. Алай бизни Жаратхан  жинлени жашауларына къатышыргъа эркин этмегенди.  Ол фарызды. Хыйныдан хайыр  жокъду, ол жаланда аманлыкъ келтиреди, деп билдиргенди Аллахутала бизге. «Хыйнычы къайда болса да, ол харипди». Бу аят да шагъатны сёзлериме.

Мухаммат файгъамбар, Аллахны саламы анга болсун, былай айтханды: «Адам хыйнычыгъа келип, бир зат соруп, аны айтханына ийнанса, аны намазлары 40 кюнню ичинде къабыл болмазла» (Муслим). Ма энтта хадис: «Хыйнычыгъа келип, аны айтханына кёл салгъан Мухаммад файгъамбаргъа берилгеннге (Къураннга) ийнанмайды» (Ахмат, Абу Даут, Тирмизи).

Хыйныны кетерлик кюч жаланда Къуранды, Аллахуталаны сёзлеридиле.  Сыйлы Китапда  бизни Жаратхан былай айтады: «Биз муминлеге Къуранны ичинде дарман да, ырахмат да тюшюрдюк». Аны магъанасы - муслийманла  дарманны бек алгъа Къуранны ичинде излерге борчлудула.

Кесинги хыйныдан къалай сакъларгъа боллукъду? Аллах санга берген фарызланы заманында эт, Къуранны кёп окъу, Аят Аль-курсини къайтар, деп юйретгенди Мухаммад файгъамбар, Аллахны саламы анга болсун.  Аурууну эки зат бла хорларгъа боллукъду, дегенди Аллахуталаны келечиси. Биринчиси – Къуран. Экинчиси уа – бал. Башха хадисде уа былай айтылады: «Дуния башында эм иги суу- Зам-замды. Ол сизге эм иги дарманды».

Сыйли китапда дарманланы арасында дагъыда къара тмин да сагъынылады. «Ол ёлюмден башха битеу ауруулагъа жарайды» (Бухари, Муслим).  «Хыйныдан эм иги дарман – кесингден къан алдырыуду (хиджама)» (Бухари, Муслим). 

Финик кёп ашаргъа да юйретеди Аллахуталаны келечиси. Ач къарангылай эрттенликде абидез алып, намаз къылгъандан сора юч, беш (экиге кереленмеген санда) финик ашап, тилек этген хыйнычыланы заранындан  кесине  болушлукъ табар.

Харам зат ашамагъыз, ичмегиз.  Не гюняхдан да сакъларгъа кюрешигиз – уллу, гитче деп къарамай.  Садакъаны керек жерге кёп беригиз, чомарт, халал болугъуз, жутлукъ, къызгъанчлыкъ этмегиз. Берген алгъан къолдан игиди.

Андан сора, да намазланы ууахтысында къылыгъыз, мынафыкъ болмагъыз, кесигизни шайтаннга алдатмагъыз. Эрттенликде туралмай, жассыда жукълап къалып, заранлы болмагъыз. Тобагъа къайтыгъыз, истихфар кёп этиучю, Аллахуталадан кечгинлик тилеучю болугъуз. 

Аллахуталадан кечгинлик тилегиз, анга махтаула салыгъыз, шукурла этигиз. Эрттенликле уяналлыкъмыса? Аны билемисе? Аны ючюн Аллахуталагъа къуллукъла этерге ашыгъыгъыз. Не болумда да жангыз Аллахха ышаныгъыз, болушлукъ андан излегиз. Бармагъыз хыйнычылагъа, бизни Жаратханнга ышанмагъаныгъызны, аны къарыууна, кючюне, ырахматлыгъына ийнанмагъаныгъызны ачыкъ этмегиз, харип болмагъыз!