Ново-Ивановскоеде жангы школ кёп да бармай эшиклерин ачарыкъды

Ново-Ивановское элде жангы школну къурулушу бошалыргъа  кёп къалмагъанды. Май районну жер-жерли администрациясында айтханларына кёре, РФ-ни Къырал Думасыны депутаты Геккиланы Заур эмда КъМР-ни Жарыкъландырыу, илму эм жаш тёлюню ишлери жаны бла министри Анзор Езаов бу кюнледе анда иш къалай баргъаны бла шагъырейленнгендиле. Къонакълагъа районну жер-жерли администрациясыны башчысы Татьяна Саенко, жангы учрежденияны оноучусу Елена Хиврич эмда къурулушну бардыргъан организацияны таматасы Насталаны Алий-Солтан тюбегендиле.

Бу элде жангы школ болургъа кереклисин республиканы Башчысы Казбек Коков 2018 жылда анда болгъан кезиуюнде айтып, тийишли буйрукъ берген эди. Бюгюнлюкге уа объект 92 процентге хазырды. Суу эмда жылыу бла жалчытыучу системала жарашдырылгъандыла, канализация да барды.  Дагъыда школну Интернетге къошхандыла, аллында уа асфальт эмда плитка салып, хар нени да тап этгендиле.

Билим бериу учрежденияда юч мастерской боллукъду, къатында уа физкультура бла кюреширге жараулу майданы барды. Спорт эмда актовый залла да хазырдыла. Школну жылыу эмда электрокюч бла кесини энчи котельнясы бла электростанциясы жалчытырыкъдыла. Айтханларына кёре, аны хайырындан быллай жумушлагъа къоранчла азыракъ боллукъдула. Учрежденияда орнатылгъан оборудование, башха затлары да федерал билим бериу стандартлагъа толусунлай келишедиле.
Саулай айтханда, объектни къурулушуна 340 миллион сом къоратылгъанды. Ол кеси да болжалындан алгъа битгенди. Казбек Коковну буйругъуна тийишлиликде, аны быйыл биринчи сентябрьде къууанчлы халда ачаргъа белгиленеди.

Къонакъла школну ичине, тышына да къарагъандыла, къурулушчулагъа махтау бергендиле. Ала ишлерин кёл салып этгенлерин да чертгендиле. «Жарсыугъа, бюгюнлюкде къурулуш рынокда уллу кёллюлюк этген подрядчиклени саны аз тюйюлдю. Насталаны Алий-Солтан эмда аны ишчилери уа жаланда махтаугъа тийишлидиле. Ала сюеген школ тынгылыды, ариуду, кёп жылланы къууандыргъанлай турлукъду. Анда шахардан келип окъургъа сюйген сабийле боллукъларына мен ишексизме», - дегенди Татьяна Саенко.

Геккиланы Заур да подрядчик школгъа уллу къыйын салгъанын чертгенди. Учрежденияны башчысына уа анда ишлерик педагогла ёсе келген тёлюню юйретиуде, алагъа билим бериуде бютюнда уллу жетишимлеге жетерлерин тежегенди.