Криминал болум

Ахчаны бир кесегин сыйыргъанды

 Къуллугъун-кесине таплыкъгъа.

 КъМР-де МВД-ны экономика аманлыкълагъа эм коррупциягъа къажау управлениясыны келечилери оператив тинтиулени кезиуюнде культура хазнаны сакълау жаны бла сферада учрежденияладан бирини башчысыны къуллугъун толтургъан полномочияларын артыгъы бла  хайырланнганын ачыкълагъандыла.

Оперативниклеге белгили болгъаныча, 2019 жылда мартдан  2020 жылда июльгъа дери кезиуде 34-жыллыкъ тиширыу управленияны келечилерине премияла бериуню юсюнден бегимлени чыгъаргъанды, алай бла миллион сомдан артыкъ тёленнгенди. Ызы бла уа ахчаны бир кесегин кесине къайтартханды. Алай бла ол 190 минг сом къоллу болгъанды.

Ишеклиге РФ-ни УК-сыны 285-чи статьясыны 2-чи кесегине кёре терслеу материалла ачылгъандыла (къуллугъун артыгъы бла хайырланнганы ючюн).

Машинасын тюкен этип

Зольск районну полициячылары РФ-ни УК-сыны 228.1-чи статьясына кёре ачылгъан терслеу материалланы тинтип бошагъандыла (законлагъа бузукълукъла этип, наркотиклени хазырлагъаны, сатханы эм жюрютгени ючюн). Районну наркополициячылары Пятигорскдан 46-жыллыкъ эр киши республикада синтетика наркотиклени сатханын ачыкълагъандыла.

Право низамны сакълаучулагъа белгили болгъаныча, ол ууну кесини машинасындан сатып болгъанды. Ол мурат бла республикагъа юч кере келгенди.

Материалла сюдню къараууна берилгендиле.

Чархсыз къалгъанды

Хасаниячы жаш адам  Интернетде «УАЗ» машинагъа чархла сатылгъаныны юсюнден билдириуню кёрюп, аны басмалагъаннга жазгъанды. Алай бла жаш аланы сатып алыргъа келишгенди эмда  иесине 14 минг сомну ийгенди. Алай ахча тюшгенлей, билдириуню иеси тас болгъанды.

Бу шартла бла байламлы право низамны сакълаучула уголовный иш ачхандыла.

КъМР-де МВД-ны келечилери хыйлачылагъа кесигизни алдатмазгъа, сакъ болургъа чакъырадыла. Товар Интернетде багъасындан учуз сатыла эсе, ишекли болугъуз, хыйлачыла алай алдаргъа ёчдюле. Дагъыда багъаны толусунлай алгъадан тёлеригизни излей эселе, ахчасыз къалырыгъызгъа къоркъуу уллу болгъанын унутмагъыз.