Таксилени ишлеринде не зат тюрленирикди?

Республиканы Транспорт эмда жол мюлк министерствосундан билдиргенлерине кёре, келир жылдан башлап жамауат транспортну иши бла байламлы жорукълада кёп тюрлениу боллукъду.

Алай бла энди таксиге пассажир олтургъаны бла анга жолну багъасын, маршрут тюрленирге боллукъ эсе, аны сылтауун эмда жерине къачан жетерге боллугъун айтыргъа керекди.

Алгъадача, пассажирле маршрутну кеслери сайларгъа эркиндиле. Алай адам жаланда барлыкъ жерин айтханы бла къалса, таксини водители эм къысха жолну сайларгъа керекди. Аны юсюнден алгъын жорукълада да айтыла эди, энди уа аны юсюне азыракъ заман алгъан маршрутну сайлау къошулгъанды.

Жангыртылгъан жорукълада таксини хайырланнган ючюн берилген чеклени тюрлюлери кенгертиледи. Энди ала электрон халда жарашдырылыргъа боллукъдула. Ол санда кеслери иш къурап къармашханлагъа къуралгъан приложение бла да.

Таксини водители машинасыны ал панелинде визитка тутаргъа керекди деген излем кетериледи. Дагъыда ала стоянкагъа тебирегенлеринде «В парк» деген билдириу такъмазгъа да эркиндиле.

Келир жылдан башлап, пассажирлени ташыу бла кюрешген служба заказла бла байламлы асламыракъ информацияны тутаргъа керек боллукъду. Шёндюгю жорукълада ала жаланда заказны номерин, ол къачан алыннганын, машина барлыкъ заманны эмда аны маркасын, сора жерни жазып турургъа борчлудула. Энди уа аланы юсюне журналгъа машинаны номерин, водительни атын эмда тукъум атын, такси жерине жетген сагъатны, маршрут неллай бир заман алгъанын, заказчикни къошакъ излемлерин (сабий кресло, таксини классы эм башхала) жазаргъа тюшерикди. Бу информацияны эм азындан жарым жылны сакъларгъа керекди.

Жамауат транспортда уа тюрлениу боллукъмуду?

Бу жорукълада «электрон билет» деген термин чыгъарыкъды. Аллай билети болгъан пассажир жаланда паспортун кёргюзтюп къояргъа да боллукъду. Сюйсе уа билетни (ол энчи иели тюйюл эсе) символ-, штрих-, QR-кодларын.

Пассажирлени ташыу бла кюрешгенле билетни, квитанцияны, жюк ючюн квитокну бир документге тийишдирирге эркин боллукъдула. Шёндю аланы бары да башха-башхадыла.

Жангы жорукълагъа тийишлиликде пассажирлени жюклерин автобусха аны иелери салыргъа керекдиле. Шёндю уа аны адамла кеслери этедиле.

Пассажир транспортну водители автобус адамла айтхан жерледе да тохтаргъа боллугъун аллындан окъуна айтыргъа керекди. Дагъыда лицензияларыны номерлерин билдирирге, троллейбусну, автобусну, трамвайны ичлеринде пассажирлени эркинликлерини эмда борчларыны юсюнден билдириуле тагъаргъа тюшерикди. Алада энди надзор органланы телефонларын да жазмаса боллукъду.

Документ кондукторланы борчларын да кенгертеди: билетле сатыудан сора аланы эмда маршрутланы санын тергерикдиле, жолгъа тёленнгенине да кёз-къулакъ боллукъдула. Аладан бла водительледен транспортда унутулуп къалгъан аберилени къоркъуулу затла болуруна тинтиу борч кетериледи. Энди быллай хуржунланы неда пакетлени автовокзалны эмда автостанцияны жууаплы адамына берирге керекдиле.

Жорукълада вокзалладан эмда станцияладан тышында жамауат транспорт тохтаучу пунктла адамланы жауундан, къардан, буздан къорууларгъа керекдиле деген излем кетерилгенди. Алай ол жерледе павильонла неда навесле болургъа кереклисин борчха салгъан ГОСТ а тюрленмей, андан арысында да хайырланыуда боллукъду.