Республиканы эркинлиги ючюн жанларын берген аскерчилени хурметлегендиле

РФ-ни Следствие комитетини КъМР-де следствие управлениясыны Май районда бёлюмюню къуллукъчулары 3-чю номерли кадет школну окъуучуларына «Кишиликни дерсин» бардыргъандыла.

Бёлюмню башчысы Ахмед Ашхотов бла аны орунбасары Тахир Хацуков кадетлени Курп бийикликге элтгендиле. Уллу Ата журт урушну жылларында уа  1942 жылны кюз артында былайда фронтну ызы юч айдан да кёп заманны баргъанды. Аны узунлугъу 22 километр, кенглиги 4 километрге жетгенди. КъМР-ни эркинлиги ючюн эм къанлы сермеш былайда баргъанды. Курп бийикликге душман кёп санда техникасын, аскерчилерин да жыйгъанын белгилерчады. Совет аскерлени къоруулау ызын 6 дивизия бла 4 полк къурагъандыла. Бу бийиклик ючюн сермешде Къызыл аскерлени 7 мингден аслам офицери бла аскерчиси жанларын бергендиле.

Кадетле Къабарты-Малкъарны гитлерчиледен эркин этиуню, ол къанлы къазауатны тарыхына, совет аскерчилени жигитликлерини юслеринден хапарлагъа сейир этип тынгылагъандыла.