Хыйлачыла 161 минг сом къоллу болгъандыла

Бир кюннге республиканы эки инсаны хыйлачылагъа кеслерин алдатып, 161,5 минг сомларын тас этгендиле.

40-жыллыкъ нальчикчи Интернетде машинагъа чархла сатылгъаныны юсюнден билдириуню кёргенди. Ол сатыучугъа 19,5 минг сомну ётдюргенди, алай ахча тюшгенлей, билдириуню иеси тас болгъанды.

59-жыллыкъ чегемли уа малла сатып алыргъа умут этгенди. Ол да Интернетде билдириуню кёрюп, аны иесине 142 минг сомну ийгенди.

Республиканы хурметли жамауаты! Сизден товар ючюн ахчаны толусунлай банк картагъа, электрон бохчагъа, башха системаланы болушлукълары бла ётдюрюрге излей эселе,   сакъ болургъа кереклисин энтта бир кере эсгертедиле полициячыла. Интернетде сатыу-алыу этгенде, товар келгинчи ахчаны толусунлай тёлегенде,  экисин да тас этерге къоркъуу болгъанын унутмагъыз.