Предпринимательлени кредитле бла онгдуруу осал тюйюлдю

КъМР-ни экономиканы айнытыу министри Рахайланы Борис, «КъМР-ни айнытыу Корпорация» акционер обществону башчысы Чочайланы Ахмат да къатышып, МСП Банкны башчысыны орунбасары Арсан Демельханов эмда бу финанс учрежденияны бизни республикада бёлюмюню таматасы Байсолтанланы Ахмат бла тюбешгенди. Ала МСП Банкны былтыргъы ишини эсеплерини эмда быйылгъа белгилеген умутларыны юсюнден сёлешгендиле, деп билдиргендиле министерствону пресс-службасындан.

Демельханов Арсан айтханнга кёре, РФ-ни Экономиканы айнытыу министерствосу салгъан борчну банк жик-жиги бла толтургъанды. Ол санда СКФО-ну субъектлеринде, энчи Къабарты-Малкъарда да финанс-гарантияла бериу жаны бла жумушланы да тындыргъанды. Къабарты-Малкъарда бу банк гитче эмда орта предпринимательство бла кюрешгенлеге былтыр кредит гарантияла жаны бла 387 миллион сом багъасына себеплик этгенди. Быйылгъы борчланы да ол халда толтурургъа умут этедиле банкда.

Финанс учрежденияны 2026 жылгъа дери айнытыу стратегиясында технологиялы продукциягъа бек уллу магъана бериледи. Экспресс-кредитлеге, гарантия себеплик этиуге, бийик технологиялы эмда инновациялы компанияланы кредитле бла онгдуруугъа энчи эс буруллукъду, дегенди Демельханов Арсан.

Ызы бла Байсолтанланы Асхат банкны Къабарты-Малкъарда бёлюмюню ишини эсеплери бла шагъырейлендиргенди, аны инновациялы проектлерин да туура этгенди. Айтханына кёре, банкны иши асламысында гитче эмда орта предпринимательствогъа кредитле (ол санда 13,5 процентге залогсуз) бериу бла байламлыды. Дагъыда инвестиция жумушланы учуз (ставкасы 7,5 процентден башланнган) кредитле бла жалчытыргъа амал барды.