Мураты адамлагъа болушлукъ этергеди

Темиржанланы Фарида бюгюнлюкде КъМКъУ-ну медицина факультетини «Мурдорлу медицина» ызыны аспирантыды. Андан сора да, Москвада Россейни илму-излем медицина университетини «Дерматология-венерология» ызыны ординатурасында да окъуйду.

Фарида Хасанияда туугъанды. Нальчикни бир-бир предметлени терен окъутхан тогъузунчу номерли мектебинде билим алып, аны алтын майдалгъа бошагъанды. Школда окъугъан кезиуюнде окъуна ол илму жанына кёл салып, Сабийлени бла жаш тёлюню чыгъармачылыкъ юйюне биология дерсден, медицина жаны бла да кружоклагъа жюрюп тургъанды. Анда юйретген устазы Црайланы Татьяна аслам затха тюшюндюргенин, аны хайыры бла кёп сабий ЕГЭ-лерин бийик баллагъа берип, окъуугъа да аны себепли бюджет бёлюмлеге кирирге онг тапханларын черте, ыразылыгъын билдиреди.

Кружокга жюрюй, Темиржанланы къызлары биологиядан Татьяна Игоревнаны башчылыгъында илму иш да жазады. Алай бла онунчу, онбиринчи класслагъа жюрюгенинде да биология жаны бла «Юность. Наука. Культура» Битеуроссей олимпиаданы республикада бардырылгъан урумунда хорламгъа тийишли болуп, артда Москвагъа да баргъанды. Къыралыбызны ара шахарындан а, эки кере да алчы жерлеге тийишли болуп, дипломла, саугъала бла да къайтханды. Нек дегенде  сабийлени кёзлери иги нек кёрмей башлагъанларыны эмда аланы араларында артыкъ ауурлукъну сылтаулары неде болгъанларын ол кесини ишлеринде тынгылы ачыкълап, юлгюле да келтиргенди.

Андан тышында да, окъуугъа кёл салгъаны, жамауат ишге къатышханы, регион эмда къырал даражалы дерс олимпиадалада дайым да ахшы кёрюмдюле болдуруп тургъаны ючюн онбиринчи классда болгъан кезиуюнде республикабызны ол замандагъы Башчысы Юрий Коковну премиясына да тийишли болгъан эди.

Мектепни бошагъанында уа, сёз ючюн, биологиядан Бир къырал экзаменде 90 балл алып, университетибизни медицина факультетини «Багъыу иш» ызына, белгилегенибизча, бюджет бёлюмюне киргенди. Ол жыл а анда аллай жаланда он жер бар эди.

Студент кезиуюнде да Фарида окъуугъа, билимге итиниулюгю бла айырмалы бола, тюрлю-тюрлю конференциялагъа къатышханды. Аны ингилиз тилде жазгъан ишлери уа «Скопус» илму базагъа, бирси, орусча жазылгъанлары уа, ВАК-ны эмда РИНЦ-ни тизмелерине кийирилгендиле. Быллай даражада болур ючюн а, аланы къалай кёл салып тамамларгъа кереклисин илму бёлюмледе кюрешгенле бютюнда биледиле.

Волонтёрлукъ иш бла да кюреше, жамауатны, «Волонтёрла-медикле» Битеуроссей биригиуню жанындан да ыспасха тийишли болгъанды. Бютюнда ол студент кезиуде дуния пандемия болумлагъа тюшюп, ковидден ауруп, юйлеринде жангыз кеслери тургъанлагъа дарманла, аш-азыкъ продуктла да элтип тургъанды. Врачлагъа уа приёмлада, саусузлагъа жашагъан жерлерине барып къараргъа эс тапдырыргъа болушлукъ этип да тургъанды. Ол, андан сора да, аурууну экинчи толкъунуну кезиуюнде Нальчикде Сабий клиника больницаны мурдорунда ачылгъан госпитальны «къызыл тийресинде» да ишлегенди. Коронавирусха къажау салгъан къыйыны ючюн а КъМР-ни Башчысы Казбек Коков Сыйлы грамотала бла саугъалагъан студентлени арасында да болгъанды.

2021 жылда КъМКъУ-ну медицина факультетин къызыл дипломгъа таулу сабийледен жетеулен бошагъан эдиле да, аладан бириди Темиржанланы къызлары. Андан ары окъууун ёсдюрюрге итиниулюгю бла, ол, белгилегенибизча, Москвада ординатурагъа, андан сора да, кесибизни университетибизде аспирантурагъа да киргенди.

Алада да окъуй, илму конференциялагъа къатыша, кёз къарамын кенгерте, ангылауун да байыкъландырады. Илму башчысы, патологиялы физиологиядан юйретген Ирина Борукаеваны башчылыгъында бюгюнлюкде тери аурууланы терапияларыны эмда аланы тюрлюлерине багъыуну башха-башха амаллары бла байламлы диссертациясын жаза турады. Преподавательлерини юслеринден сагъына, андан сора да, педиатриядан окъутхан Жетишланы Рашитни дерслерини сейирликлерин, тынгылылыкъларын унутхан къыйын болгъанын, аллай адамларыбыз аны кёллендиргенлерин, аладан юлгю да алгъанын айтады. «Аланы кёре, ишлерге, билиминги ёсдюргенлей турургъа да талпынаса, алгъа барыргъа, айныргъа да итинесе», - дейди ол.

Урунуу жолун а Фарида Кенжени амбулаториясында участкалы терапевтден башлагъан эди. Бюгюнлюкде уа Москвада билим алгъаны бла бирге, Россейни Федерал медицина-биология агентствосуну 85-чи номерли клиникалы больницасында ишлеген да этеди. Кесини битеу да жетишимлери ючюн а ёз ата-анасына, къайынларына да ыразылыгъын билдиреди. Алгъаракъда хасаниячы Сарбашланы Алибек бла юйюр къурагъанды.

Окъууундан, ишинден тышында уа,  ингилиз тилге юйренеди. Аны билмей, бюгюнлюкде врачха ишлерге къыйын боллугъун да ангылатады. Ол дагъыда миллет тепсеулени сюеди, фортепианода согъаргъа юйренирге жюрюп тургъанды.

Саулукъ сакълау бла байламлы, суратлау литератураны да дайым окъуйду. Бюгюнлюкде адамны не жаны бла да ангылауу тийишли даражада болургъа кереклисине ийнанады.  Жашауда адам улуну насыбы эм алгъа аны юйюрюнде болгъанын къатлай, дуниягъа мамырлыкъ тилейди.

Быллай, окъургъа итиннген, билимлери-ангылаулары бла да жамауатха болушлукъларын, хайырларын тийдирирге излеген, иш кёллю жаш тёлюбюз жаланда кеслерини угъай, халкъыбызны атын айтдыра, миллетибизни не жаны бла да айныууна къошумчулукъ этериклерине ышанабыз. Фарида уа, адамланы саулукъларына къайгъыра, къайда, къайсы бёлюмде, ол а ючюсюнден – трихологиядан, косметологиядан эмда дерматологиядан-сайлау этерге сюерикди, урунса да, кесини сынамын къагъытха тюшюре, аны илму кёз къарамы бла ачыкълай, бирсилени да оюмлары, юлгюлери, амаллары бла да шагъырейлендирир муратдады.