Кёп арсарлыкъла кетгендиле

Биринчи заманда капремонт ючюн адамла артыкъ тёлерге сюймей эдиле. Нек? Не заманда эсе да этиллик ремонтха ийнанмагъандан. Алай сюдле болуп, тёлемегенлени ахчаларын счётларындан алып башладыла. Сора, кертиси бла да, юйледе тынгылы ремонтла этилгенлерин кёрдюк. Нальчикде кёпкъатлы юйлени бир - бирлеринде лифтлени окъуна алышхандыла.

 Россей Федерацияда бюгюнлюкде кёп фатарлы юйле бары да 2,5 миллиард квадрат метр жерни аладыла. Аладан экиден бирине тынгылы ремонт этилирге керекди. Кёп болмай ишленнген юйлени да,  эртте-кеч болса да,  ол кезиулери жетерикди.

Беш къатлы юйню башын жабар ючюн неда жангы лифт орнатыр ючюн миллионла керекдиле. Къайдан табылсын ахча? Бюджетден? Алай бизни къыралда адамланы ючден бири энчи иели юйледе жашайдыла. Алай эсе, ала тёлеген налогладан башхала жашагъан кёп фатарлы юйлеге ремонт нек этилирге керекди?

КъМР-ни Къурулуш эм ЖКХ министерствосунда билдиргенлерине кёре, фатарланы иелери ремонтха къоратыллыкъ ахчаны къайсы счётха жыяргъа кереклисини оноуун кеслери этедиле. Мында министерство юйню аты бла энчи счёт ачаргъа эсгертиу этеди. Алай бла адамланы жыйылгъан ахчагъа кеслери оноу этерге онглары барды.  Алай тюйюл эсе уа, ишни къолгъа къырал  алады, ахча уа регион операторну счётуна кёчюрюледи.

Мында бир затны эсгертирге тийишлиди: фатарланы иелери, юйню аты бла жыйылгъан ахчаны андан алып, кеслери, башында айтылгъаныча, энчи счёт ачып, аны анда жыяргъа эркиндиле.

Тынгылы ремонт этиуге ахча жыйылып тебирегени ючюн къырал бу ишден бир жанындады дерге да жарамаз. Сёз ючюн, озгъан жыллада бу фондха къырал да аслам ахча къошханды.

Фатарланы иелеринден сора, ахча къалай жыйылгъанын жашау журтлагъа надзор этиу инспекция, прокуратура, казначейство, регионланы эсеплеу палаталары да тутадыла контрольда.  Жыл сайын аудит бардырылады. Битеу информация интернетде бла СМИ-де басмаланады. Дагъыда  хар регионда этиллик ишлени багъа  мардалары да белгиленеди.

Къолайсызлагъа, абаданлагъа да къырал бу жаны бла билеклик этеди.  Регионланы асламысында ЖКХ-ны жумушларына къоранчланы ёлчеми  юйюр тюшюрген хайырны бешден биринден кёп болмазгъа керекди. Аны чыгъаргъанда, тынгылы ремонтха берилген тёлеуле да тергеледиле. Бир-бир категория гражданлагъа аны 50 неда 100 проценти компенсация этиледи

 Регион операторла  халкъ битеу информацияны билир ючюн, квитанцияланы арт жанларында жазадыла.