«Окъууунгдан зауукълукъ табар ючюн, тюз сайлау этерге керексе»

Мени бюгюннгю жигитим К. А. Ясауи атлы халкъла аралы къазах-тюрк университетни студенти Токълуланы Асланны къызы Алинады.  Ол вузну стоматология факультетине хасаниячы къыз 2018 жылда окъургъа киргенди. Бюгюнлюкде ол 4-чю курсдады. Ушагъыбызда студентка бу окъуу юйню къалай бла сайлагъаныны, башха къыралгъа барып билим алгъан къыйынмыды, деген сорууларыма сюйюп жууапла бергенди.

Алайды да, багъалы газет окъуучула, сизни да Алина бла танышыргъа чакъырабыз. Ким биледи, аны сынамы энтта бирлени анда билим алыргъа кёллендирир эсе уа…

 Нальчикден жыл сайын бу вузда окъургъа таулу сабийлени айыргъанларын эшитип, Алина кесин сынаргъа сюеди.  Сора, окъуу юйню сайтына кирип, анкетаны толтуруп ашырыргъа кереклисин биледи. Аны бла бирге уа бир ненча соруугъа да жууапла берирге керек эди. Университетден а жууап келгенлей, тийишли документлени хазырлап башлагъан эди къыз. Битеу ол ишде уа анга къарындашы  Руслан болушханды.

Чакъырыу къагъыт келгенден сора, Алина Къазахстаннга тебирейди.   Биринчи жыл къазах эм тюрк тиллеге юйреннгендиле.  Аладан ахшы балла алсанг а, биринчи курсха ётесе. Окъууну бошаса, халкъла аралы диплом аллыыкъды. Дагъыда башха миллетлени маданиятлары бла шагъырейленирге, башха миллетлени сейир адамлары бла танышыргъа бек сейирди быллай жерде.

Алина тишлеге къараучу врач болургъа сабийлигинден бери мурат эте эди.  «Адамны тишлери ариу болсала, ол кёбюрек кюлюрге кюрешеди. Башха аланы бет жарыкълыкъларын кёрюу манга зауукълукъ береди», - дейди мени ушакъ нёгерим.  

Хар тышында окъугъан сабийча, мени жигитим да юйюнден кери турургъа терк юйренмегенди. Биринчи заманда юйюне барлыгъы келип, кёп къыйналгъанды. Къысха заманнга билирге тюшеди, аны себепли окъуугъа кеп заманы кетип, андан да артыкъ бош заман къалмай, тургъан жеринде жашаргъа юйреннген.  

Университетде битеу  преподавательле бийик билимлиле, ишлерин билген чынтты профессионалладыла. Асламысы доцентледиле. Сёз ючюн, Мухтар Искендеров Къазахстанны къыбыла жанында стоматологияны мурдорун салгъан адамды. Ыйыкъ сайын студентлени усталыкъларына кёре  форумла  ётдюредиле.

- Иги окъугъанла мындагъы ахча бла иги степендия аладыла. Меники 65 минг тенгеге жетеди. Бизни ахча бла ол 10 минг сомду. Ол манга, юйюмден болушлукъ излемей, кесими кечиндирирге жетеди, дейди Алина. 

Окъуудан сора да, университетде кюн сайын тюрлю-тюрлю жыйылыула, тюбешиуле, концертле, кружокла ётедиле. Къазахстанны белгили жырчыларын чакъырып, студентлеге уллу байрамла къурайдыла. Сёз ючюн, биринчи курсха алыннганлагъа энчи эс бёлюп, аланы студентге жоралауну жарыкъ ётдюредиле. Алай бла жаш тёлюню эрикдирмейдиле.

Окъугъан жерими инфраструктурасы бек игиди.  Кёп болмай къызланы общежитлерине ремонт этип, жангы мебель да салгъандыла.

 - Жашагъан жерибиз бир отоулу фатарчады. Анда не да барды, деп махтанады Алина.  Аллай бир фатар ючеуленнге бериледи. Алина бла бирге эки таулу къыз Тёппеланы Лейля эм Созайланы Талита жашайдыла. Тургъан жерлеринден башха затлары да бек омакъды. Сёз ючюн Вузну китапханасы Азияда эм уллугъа саналады.  

- Диплом халкъла аралы даражалы болгъаны себепли, ишлерге къайда да боллукъду, алай кёбюсю Тюркню сайлайдыла. Практика жаны бла да онгла асламдыла. Бир-бирде ишге тохташыу жаны бла да болушлукъ тапдырадыла.

Жарсыугъа, юйге келир онг жылны ичинде табылмайды. Жаланда жайда, экзаменлени берип бошагъандан сора келеди Алина Хасанияда юйюне. Келсе уа, жууукълары бла, къаршылары бла не къадар кёп заманын  ётдюрюрге кюрешеди. Андан башха Огъары Малкъаргъа бармай, анда табийгъатыбызны кёрмей бир да кетмейди. Бош заманы болгъан кезиуде уа интернетде сабийлени тишлерине къалай къараргъа кереклисини юсюнден ата-аналгъа хапар айтып, соруулагъа жууапла береди.

Бу усталыкъны адам жаланда жюреги тартып сайларгъа керекди. Алай болмаса, окъууунгдан да зауукълукъ табаллыкъ тюйюлдю. Студент жашау ол жашлыкъ, оюн, кюлкю деген затладан къуралады. Терс сайлау бла сен аланы барысындан да къуру къалыргъа боллукъса, - дейди мени ушакъ нёгерим Токълуланы Алина.