Эл тийрелени айнытыугъа – 645 миллион сом

Россейни Эл мюлк министерствосу Къабарты-Малкъарда эл тийрелени айнытыу жаны бла алты проектни дурус кёргенди. Алагъа «Эл тийрелени комплекс халда айнытыу» деген къырал программаны чеклеринде келир жыл иги кесек ахча берилликди.

Социал магъаналы башламчылыкъла беш районда бардыла, дегендиле КъМР-ни Эл мюлк министерствосунда. Сёз ючюн, Басхан районда Псыхурей элде школгъа дери билим берген учреждениягъа тынгылы ремонт этерге, сора дагъыда эки орамда суу быргъыланы жангыртыргъа умут барды. Аладан сора да, 300 жерли Маданият юй ишлерге сюедиле. Аны къурулушу келир жыл башланырыкъды, объект кеси да 2024 жылда хазыр боллукъду.

Прохладна районда Алтуд элде маданият-солуу арада тынгылы жангыртыу ишле бардырыргъа дейдиле. Дагъыда юч орамда суу быргъыланы алышырыкъдыла.

Чегем районда Шалушка элни айнытыу проектине эки спорт объектни къурулушу киреди. Бири футбол майданды, экинчиси уа спортну кёп тюрлюлеринде хайырланылгъан аллай тийре. Проект эки жылны ичинде тамамланырыкъды.

Черек районда Аушигер элде таза суу бла жалчытхан ыз ишленирикди эмда 300 жерли Маданият юйню къурулушу бардырыллыкъды.

Элбрус райондан а эки проект сайланнганды. Биринчисине тийишлиликде Тырныауузда маданият юйге тынгылы ремонт этилирге керекди. Сора дагъыда Тегенекли элде суу бла жалчытхан сеть жангыртыллыкъды. Экинчиси уа Элбрус элде спорткомплексни эмда Маданият юйню къурулушлары бла байламлыды.

Бу ишлени барына да 2023-2024 жыллада 645 миллион сом къоратыргъа дейдиле. Ол санда 607,7 миллион сомну федерал бюджетден, 6,1 миллионну – республиканы бюджетинден берликдиле. Къалгъан 31,2 миллион сомну уа муниципалитетле кеслери къошарыкъдыла эмда бюджетледен тышындан жерледен мажарыкъдыла.