Абадан къауумгъа дайым къайгъырады

Хабазны огъурлу адамларындан бири, Мусукланы Имметни жашы Рамазан сексен жылдан атлагъанына да къарамай, бюгюнлюкде элни ветеран биригиуюню жумушун жюрютеди. Жер-жерли администрацияны башламчылыгъында бардырылгъан кёп тюрлю ишлени тамамлайды, ол санда 9 майда Уллу Хорламны кюнюне хазырланыу, 28 марта Малкъар халкъны жангырыу кюнюн белгилегенде эм башха байрам кюнледе ётдюрюлген жыйылыулагъа тири къатышады. Элни абадан къауумуна, урунууну ветеранларына да сакъды.

Шёндю къырал урушну, урунууну ветеранларына, пенсиячылагъа къырал иги къарагъанын ыразылыгъы бла айтады ол бизге. Элде Афган урушха къатышхан юч жаш, тылчылагъа саналгъан да ондан асламдыла. Алагъа эл, район администрация да тохтамагъанлай эс бургъанлай турадыла, деп чертгенди Мусук улу.

Рамазан урунуу жолун кёчгюнчюлюкден къайтхандан сора, элде Нальчикни бояу чыгъаргъан заводуну цехинде башлагъанды. Андан сора совхозну сабанчы бригадасына таматалыкъ этгенди. Кёп жылланы Хабазны Эл советини председатели болуп тургъанды. Артда совхозуну таматасыны орунбасары, ызы бла профсоюзуну къуллугъун толтуруп да ишлегенди. Ол эки тюрлю-тюрлю къырал саугъалагъа тийишли болгъанды, ол санда «За доблестный труд» майдал да берилгенди.      

Юй бийчеси бла бирге эки жаш бла къыз ёсдюргендиле, туудукъланы саны он болады, аладан туугъанла да жетидиле, деп къууанып билдиргенди ол. Мусук улу малкъар халкъ буруннгулу миллет болгъанын, аны тарыхыны юсюнден окъургъа сюйгенин, ол жаны бла газетде хапар болса, сакълап тургъанын да айтханды.     

Дагъыда Рамазан бизге тукъумларыны юсюнден бир сейир шартны билдиргенди. Онтёртюнчю ёмюрню ахырында  Акъсакъ Темирланны аскерлеринден бу жерледе жашагъанланы бир къауумлары тау артына къачхандыла. Къаугъа кезиу бошалгъандан сора, ала артха къайтып тебирегендиле, тёрт къарындаш Мусук, Рахай, Рахайты эм Дец Гюржюден Малкъар жанына ётгендиле, алайда бир сууну къатында тохтагъандыла. Ол суугъа артда Мусук суу деп атагъандыла. Бюгюнлюкде да ол сууну аты алайды, дегенди. Къарындашладан бири, Дец, артха къайтханды, къалгъанлары мында къалгъандыла.

Бизни корр.