Эки миллионну орунуна 150 минг сом

 Полициячыла 9 ай мындан алгъа этилген уручулукъну тинтип, аманлыкъчыланы ачыкълагъандыла. Ала урлагъан мюлкню багъасы 2,6 миллиондан артыкъ болгъанды, алай ала аны 150 минг сомгъа сатхандыла.

Былтыр 21 июньда Россейни МВД-сыны Терк районда бёлюмюне жол-къурулуш управленияны къуллукъчусу келгенди. Ол полициячылагъа билдиргенича, белгисиз адамла асфальт салгъанда хайырланнган машинаны пультун бла ультразвуковой 4 датчикни урлагъандыла.  Техника келишим этилип, Плановское элде энчи иели юйде асыралгъанды.

Тийишли излеу жумушла толтуруп, уголовный розыскны полициячылары уручулукъну Чегем райондан бла Терекден 25-жыллыкъ жаш адамла эмда Плановскоеден 29-жыллыкъ эр киши этгенлерин ачыкълагъандыла.   

 Быйыл мартда ишеклиледен экиси полициягъа келип, этген аманлыкъларына женгдиргендиле. Ала айтханларыча, уручулукъдан сора Москвагъа барып, техниканы анда 150 минг сомгъа сатхандыла. Ахчаны уа кеслерини кереклерине къоратхандыла.  Бир айдан уручулукъгъа къатышхан ючюнчю инсан да келгенди полициягъа.

Урланнган техника иесине къайтарылгъанды.  

 Бу аманлыкъ бла байламлы РФ-ни УК-сыны 158-чи статьясыны 4-чю кесегине кёре терслеу материалла ачылгъандыла.