«Хар жазылыу кампаниягъа тири къошулабыз»

Элбрус районну жамауаты жаздыргъан газетлерин бла журналларын алмагъанларыны, заманында кереклисича бу жумуш жалчытылмагъаныны юсюнден жарсыуларын бизге билдире тургъандыла. Аны бла байламлы районну ара почтасыны таматасы Афашокъаланы Руслан бла ол жаны бла не этерге боллугъуну юсюнден ушакъ этгенбиз.

– Руслан, районну халкъыны бу жарсыууна кесим да шагъатма. Былтырдан бери адамла жаздыргъан газетлерине бла журналларына ие болалмайдыла, мен да аланы ичинде. Бу чурум бизни ишибизге, саулайда жазылыуну даражасына къажаулукъ этгенин ангылайса. Недеди сылтау?

– Бизни жангыз жарсыуубуз почтальонларыбыз болмагъаны эди. Хакъы азданмыды, башха сылтаула бламы эдиле, бу жумушну жалчыталмай, жамауатны да къыйнагъанбыз, кесибиз да бек жарсып тургъанбыз. Бюгюнлюкде бу кемчиликден къутулгъанбыз. Почта ишчилени саны толуду, почтальонларыбыз бардыла. 

- Къалай бла табылдыла да энди штат толурча почтачыла?

– Аны хакъ кётюрюлгени бла байлайма. Алгъын онтёрт минг сомгъа да жетмей эди. Энди уа онтогъуз минг сом болгъанды аланы хакълары. Бизни районда ол осал иш хакъ тюйюлдю. Тюздю, ишлери къыйынды. Элледен эсе, шахар ишчилеге къыйынды деп да айталлыкъма. Нек дегенде мында фатарлагъа жюрюйдюле. Ким биледи, кюннге 5-чи къатха ненча кере минип тюшерге керекдиле. Лифтле да 9 къатлы юйледе болмаса жокъдула. Аны себепли, тири саулугъу болгъан адам болмаса, кётюралмайды аллай ауурлукъну. Жаш адамла алай сюйюп келмейдиле ишлерге. 

– Тырныауузда алай кёп ишчи жер жокъду. Бошуна юйде тургъандан эсе, келип, юйюрюне бир сом-шай ишлеген иги тюйюлмюдю?

– Ол алайды. Айхай да, эндиги жаш тёлю кёп ахчаны бир жолгъа алыргъа сюеди. Аны себепли уа къыйналып ишлерге кереклисине тюшюнмейдиле. 

– Тырныауузну кесинде ненча почта бёлюм барды?Ала энди чырмаусуз ишлериклерине окъуучуларыбызгъа сёз бераллыкъмыса?

– Хау, бераллыкъма бюгюнлюкде аллай сёз. Шахарда тёрт бёлюм барды. Ара бёлюм арталлыда почтальонсуз къалгъанда, анда-санда кесим ташыргъа да кюрешгенме. Башха амалым жокъ эди. Хар бёлюмюбюзде 3-5 адам ишлейди. Экишер почтальон барды, ала жетишаладыла энди. 

Мен почтачыланы ишге алыр амалым болгъанлыкъгъа, аланы ишден кесим сюйюп чыгъарыр кючюм жокъду. Ол дегенлерин тюзге санамайма. Мен не экономия этерикме, халкъны аллай бир жарсытып, кесибизни даражабызгъа анча сёз келтирип?

– Жарсыу къуру тырныауузчулада тюйюлдю. Терс-Къолну почтасын а нек жапхансыз?

– Ол мекям Ростелекомнукъу болгъанды. Биз ала бла келишимибизни бузуп, мекямны эркин этерге тюшгенди. Алай жангы мекям тапханбыз. Кереклерибизни да ары жерлешдиргенбиз. Бу ыйыкъда ачар муратдабыз. 

Жамауатны газетлерин бла ахчаларын Элбрусдагъы бёлюмге элтип, андан а ала ташып, юлешип тургъандыла. Кесибиз мекям ишлер онгубуз болмагъаны себепли, ортакъ халда излеп табаргъа тюшгенди. Бу ыйыкъда дагъыда ол хыйсапдан Нейтринодагъы бёлюмюбюзню жапханбыз. Анда да мекям излей турабыз. Кесибизге амалла табып, жамауатны жумушларын жалчытыргъа кюрешебиз. Жаланда Нейтринода ишлерге адам табылмай турады. Кесибиз жюрютебиз ары. 

– Жамауат бла ишлеген тынч тюйюлдю. Аланы излемлери, къылыкълары да хар тюрлюдю. Кёбюсюнде не жумушла бла келедиле?

–  Сёз ючюн, пенсияларыны алгъан кюнюн алышыргъа сюйюп келедиле абадан тёлю. Биз да пенсия фонд бла келишип, сёлешип, ол жарсыуларына болушабыз. Сора телеграммаларын, къагъытларын да тас этип келгенле да боладыла. Аланы да система бла излеп, бусагъатда къайда болгъанын ачыкълап, табабыз. Терс адресге ашырылгъанла да боладыла. Аланы да тюзетип, иелерине тапдырабыз. 

– Къагъытла жазыу бармыды бусагъатда? Бу телефонла, ватсапла чыкъгъанлы адамла ала бла сёлешип къойгъан сунама.

– Тейри, къагъытла да жазадыла, телеграммала да жибередиле. Башында, «Гарабаши» станцияда почта ящик салгъанбыз да, ыйыкъгъа эки кере андан къагъытла, алгъышлау открыткала да алып, аланы керекли адреслеге ашырабыз. Дагъыда сюдден келген къагъытланы бла квитанцияланы да  биз юлешебиз.

– Районну почта ишчилерини саны ненчады? Бу бёлюмлени ичинде къайсылары ишлерине бек жууаплыдыла?

– Саулайда 50 адамды. Огъары Басханда, Нейтринода бла Бедикде почта башчылары кеслери ташыйдыла жамауатха газетин, башха затланы да. Ала гитче элле болгъаны себепли, жетишедиле. Былайды деп айырырча тюйюлдю. Кёнделенде эки бёлюмюбюз барды да, ала бек иги ишлейдиле. Лашкутадагъы бёлюм да жумушун иги жалчытады. Анда жамауат кёпдю, бары да таулула болуп, жазылыуну заманында иги кёрюмдюле бередиле. 

– Жазылыу кампаниягъа къаллай къошумчулукъ эталасыз? 

– Почтальонла барысы да жазылыуну кезиуюнде салыннган планны толтурадыла. Жазылыугъа иги болушадыла. Элбрус жанын айтханда, кесим бир да эринмей жюрюйме. Анда таматаланы иги таныгъаным себепли, сау болсунла, угъай демей, жаздырадыла. Райондан материалла кёбюрек бериле турсала, андан да бек сюйюп аллыкъ сунама. 

– Саулайда бир уллу таулу районну почта жаны бла къайгъырыулары азайырына къууандым. Жазылыу жумушха да жууаплы къарагъаныгъыз игиди. Бу жазылыуда бегирек кёл салып кюрешген къайсы организацияланы белгилеп айталлыкъса?

– Хутуйланы Любовь Шарафиевнаны, Тырныауузну 3-чю номерли мектебини таматасын. Ол саулайда коллективин жаздырады. Ата-анала бла да уллу агитация иш бардырады. Газетлеге бла журналлагъа жаздырыу проценти уллуду. Электросетьни таматасы Хапаланы Юсюпге да ыспас этерчады. Бу жумушда бек жууаплыды. Дагъыда адамланы социал жумушларын жалчытхан араны Элбрус районда бёлюмюню таматалары Этезланы Мажит бла Мырзоланы Замратха да ыспас этебиз. Ахматланы Мурадин, жоллагъа къараучу службаны таматасы, хар кезиуде бек иги эс бурады жазылыу ишге. Теммоланы Мухтар, къолайлы предприниматель жашларыбыздан бири, саулай ишчилерине бла къолайсызлагъа да жаздырыучуду. Районну Билим бериу управлениясыны таматасы Атаккуланы Нюржан да школла  таматала бла бирликде жазылыугъа тири къатышадыла. 

Энди кеси тилибизде чыкъгъан газетибизге бла журналлагъа уллу кёллюлюк этмезге керек болгъанын барыбыз да билебиз. Анга кёре хар жазылыу кампаниягъа тири къатышабыз. Жазылыу бошалгъандан сора, келип жаздыргъанла да боладыла. Ол газетни  материаллары кюнден-кюннге игилене баргъаны, районну школ жашаууна энчи эс бурулгъаны бла да байламлы сунама.