Халкъны бирикдирген кюч уллуду

Россей Федерацияны тарыхында халкъ не заманда да къыралгъа къоркъуусузлукъ жаны бла къайгъы келсе, биригип болгъанды. Шёндюгю кезиуде  да болум алайды деп айтыргъа боллукъду. Сауутланнган кючлерибиз Донбассда энчи аскер операцияны бардырып башлагъанлы кёп болмай жыл болду. Не зат тюрленнгенди ол кезиуню ичинде къыралда, бизни тёгерегибизде деп сорургъа боллукъбуз кеси кесибизден. Бек алгъа айтырыгъым, президентибиз аскерчилерибизге салгъан борчну ала шарайыпсыз толтура баргъанларына тюшюнебиз. Къыралда идеология болум, хал да тюрленнгенди иги жанына дейик, алгъынча,  Запад, Европа  Совет  эм башха жамауат биригиуле бизге не айтырыкъдыла деген затлагъа, оюмгъа да бир киши да къарамайды. СВО-ну бардырыу  бла Россей   жалынчакъсызлыгъын сакълар эм къоруулар ючюн, фашизмни жайылыуун тохтатыр ючюн артха турмазлыгъын ачыкъ кёргюзтеди, Украинаны тыш къыралла сауут-саба бла не къадар кёп жалчытып турсала да.

Эки жыл, былай алып къарагъанда, азды адамны ич дуниясын, жашаугъа къарамын тюрлендирирге да, дерге боллукъбуз. Алай, биз барыбыз да кёребиз шёндю къыралда болгъан биригиулюкню. Была бош сёзле тюйюлдюле, халкъ асламла бла тюбешген кезиуледе эшитгеними жазама, жамауат да башха  болгъанды, адамларыбыз къырал башчыбыз бардыргъан политикагъа ыразылыкъларын букъдурмайдыла, ачыкъ айтадыла.  

Эсигизде эсе, энчи аскер операция башланнгандан сора, жети айдан мобилизация бардырылыргъа буйрукъ чыкъгъан эди. Ол кезиуде  военкоматха барыргъа къоркъгъандыла, тышына кетгенле да болгъандыла… Шёндю болум ахырда тюрленнгенди. Аскерде къуллукъ этерге сюйгенлени саны ёседен  ёсе барады. Тышына кетгенлени иги кесеги да артха  къайтхандыла. Жаланда Жангы жылны аллындан бери, РФ-ни Къоруулау министри Сергей Шойгуну айтханына кёре, 50 минг адам келишим бла къуллукъ этерге чакъырылгъандыла. Адамла уллу иш хакъ алгъандан сора да, Ата журтну къорууларгъа кереклисин кеслери ангылап башлагъандыла. Аскер борчларын СВО-да тынгылы толтуруп, бизни республикадан окъуна къаллай бир аскерчибиз къырал саугъалагъа тийишли болгъандыла. 

Халкъ энди ангылагъанды келир тёлюбюз мамырлыкъда, ырахатлыкъда жашар ючюн, кюрешни, ол санда идеология жаны бла да тохтатмагъанлай   бардырыргъа кереклисин. Аны ючюн ишибизни биригип бардырыргъа керекбиз, алайсыз  тамблагъы кюн белгисиз, мутхуз болургъа боллукъду. Насыпха, бюгюнлюкде къыралны инсанлары, ол санда жаш тёлюбюз,    жалынчакъсызлыкъ ючюн артха турмазлыкъларын билдиредиле.

Энчи аскер операциягъа къатышхан жашларыбызда болгъан къарындашлыкъгъа, аланы бир бирге билеклик этиулерине сукъланырыгъынг окъуна келеди. Бир юлгю. Бу кюнледе «Звезда» федерал каналда СВО-ну ветераны-сакъаты Тёбен Чегемде ёсген Атайланы Илиясны эм аны бла бирге къуллукъ этген жашланы кёргюзтгендиле. Ол бериуде Илиясны атасы Мусабий, аскер къауумну таматасы генерал Апти Аллаудинов эм башхала да  сёлешген эдиле. Алай Мусабийни бла Илиясны айтханларын энчи белгилерчады. Атасы, жашы да эр киши, Ата журтха къуллукъ этерге чакъырылгъан эсе, ол ишни арсарсыз толтурургъа эм жаш тёлюню патриот жаны бла юйретиуге керегин белгилеген эдиле.  Къалай хычыуун кёрюне эдиле экиси да ара канал хазырлагъан бериуде.

Шёндю биз Сауутланнган кючлерибиз бла, Илияс эм аныча жигит  жашларыбыз бла ёхтемленирге боллукъбуз. Энчи аскер операцияда аскер борчларын толтургъанлагъа жамауатны болушлукъ этиую халкъны бютюн бирикдиреди. Алагъа кюн сайын керек бола тургъан затланы  автоколонна бла  ашырыу  эм юйюрлерине, къыралны эм бош адамланы жанындан себеплик тапдырыу тёреге айланнганды. Къысхасы, халкъ, хорламны жууукълашдырыргъа кереклисин ангылап, бирикгенди.

Эсигизде эсе, деменгили къыралыбыз чачылгъанда, Запад бизге хар не бла да болушурукъду, аны башчыларыны айтханларына тынгылап, анда жюрюген эриши адетлени, къылыкъланы алып тургъанбыз. Ол угъай эсе, билимибизни, маданиятыбызны  окъуна ол къыралланы мардаларына келишдирирге кюрешгенбиз, битеу дуниягъа айтылгъан культурабыз бла илмубуз болгъанын да унутуп.

 Бу эки жылны ичинде уа хар зат да туура болгъанды, аланы бизге къаллай кир ниетлери болгъанларын ангылагъанбыз. Тюз бурунубузну тюбюнде Россейге къажау кюрешни бардырыр ючюн,  Украинаны халкъын юйретип тургъандыла. Ол жумуш бир  неда эки жылгъа этилмегенди. Шёндю ачыкъ болгъан билдириулеге кёре, Украинада жашагъан бандеровчуланы тюз къырал оюлгъан кюнден хазырлап тебиреген эди Запад.

 Мен оюм этгеннге кёре, бу шёндюгю болум адамланы бир бирге жууукъ этгенди. Биз, алгъын заманладача,  къайгъыларыбызгъа жарсый, акъны къарадан, ётюрюкню кертиден айыра, жалгъан затланы да иги сезе башлагъанбыз. Бек башы уа - биз энди бир кесек эсли эм сабыр болгъанбыз.

«Энчи аскер операция Украинада тохташдырылгъан болумну  тюрлендирирге деп башланнган эди, артда уа ол коллектив Запад бла урушха айланып къалгъанды. Ол себепден  къаугъа белгиленнген мардадан асламыракъ барлыкъды»,- дегенди кёп болмай къырал башчыбызны пресс-секретары Дмитрий Песков.

Аны айтханына шагъатлыкъгъа  энтта да бир юлгю. Бу кюнледе Францияны президенти Эммануэль Макрон Елисей  мекямда бардырылгъан жыйылыуда Украинагъа дайым болушлукъ этип тургъан къыралланы къауумун къураргъа оноу этилгенин айтханды. Ала бандеровчуланы бомбала бла эм узакъ жерлеге дери жетерик ракетала бла жалчытып турлукъдула. Андан сора да, Макрон Запад къыралланы аскерлери Украинагъа болушлукъгъа жиберилирге боллукъдула, дегенди.

Макронча «политиклени» айтханларына тынгыласанг, ала акъылдан  шашханлагъа, эслерин тас этгенлеге ушайдыла деригинг келеди. Бир бирлерине ал бермей, украинлы миллетчилеге болушлукъ этерге чабышадыла, кеслерини къыралларында болгъан къайгъыланы эм америкалыланы айтханларындан чыкъмай тургъанларын унутуп. Дагъыда ала унутхандыла Экинчи дуния урушда совет аскер немисли фашизмни аркъасын къалай ууатханын.  РФ-ни МИД-ини таматасыны болушлукъчусу Мария Захарова: «Эммануэль  1945 жылда Гитлерни бункерин сакълагъан французлу солдатладан жыйылгъан «Шарлемань II»  дивизияны къураргъа умут  эте болур»,-деп, Макроннга фашистлеге жангыдан жакъ басаргъа кюрешгени ючюн тийишли жууабын бергенди. Къырал Думаны башчысы Вячеслав Володин а:  «Жууапсызлыгъы бла Макрон ючюнчю дуния урушну башларгъа сюеди», - деп чамланнганды.

 Къысхасын айтханда, бу эки жылны ичинде дуния, Западда жашагъанла да тюрленнгендиле. Алгъын Россейге къажау жашырын сюелген эселе, тюрлю – тюрлю амалланы хайырланып тургъан эселе, энди бизге къажау сюелиуню ачыкъ этгендиле. Аны бла байламлы Владимир Путинни сёзлерин келтирирге сюеме: «Биз шёндю жангы заманда жашайбыз. Аны хайырындан биз бютюн кючлю болабыз, бийик даражагъа кётюрюлебиз. Къырал кеси да ичинден тюрленеди, кеси кесин толусунлай хар не бла жалчытады, жалынчакъсызлыгъы, ол санда технология жаны кючленеди. Шёндю Россейни кезиуюдю».