«Топ бетиме окъуна тийсин, къабакълагъа кирмесин ансы»

Россейни футболдан жаш тёлю «Юг» лигасыны юсюнден айта, «Спартак-Нальчикни» эсгерирге тийишлиди. Команданы матчлары айырмалы эсепле бла бошалмагъан эселе да, эсде къалырча кезиуле уа кёп болгъандыла. yflrussia.ru сайтда аны баш тренери Аскер Кушхов бла интервью басмаланнганды, аны бла газет окъуучуланы шагъырей этерге сюебиз.

- Аскер Артурович, ЮФЛ Юг турнирни юсюнден оюмугъузну юсюнден билдирсегиз эди?

- Турнир жарыкъ, сейир кезиулеге бай болгъанды. Аны бла байламлы лиганы къурагъанлагъа, анга къатышханланы барысына да ыразылыгъымы билдирирге сюеме. Тренергеча ол манга жангы кюч бергенди, жангы онгланы кёргюзтгенди. Хау, команда артыкъ иги ойнамагъанды, бирде кесибизден къалгъанды, бирде судьяла жангылгъандыла. Былайда кёлкъалды этмейме, судьяла да жаш адамладыла, халат жиберирге боллукъдула.

Менича тренерлеге ол бек магъаналы турнирди, саулугъума чып тюшгенини хатасындан манга футболдан эртте айырылыргъа тюшгенди, профессионал даражада ойнаргъа къадар болмагъанды.   

- Сиз футболчуларыгъыз ойнаргъа энди юйрене тургъанларын, сынам жыя баргъанларыны юсюнден кёп кере сагъыннгансыз. Къалай сунасыз, турнирни биринчи жарымында иги эсепле кёргюзталмагъанлары алагъа къарыусуз жерлерин ангыларгъа болушурукъмуду?

- Сёзсюз, хау. Сен эм иги командала, эм кючлю футболчула бла ойнасанг, неде артха къалгъанынгы терк сезесе. Анга юлгю келтирейим, мени командам бегирек Махачкъаланы Л.И. Яшин атын жюрютген «Динамо» клубун жаратадыла, мен да аны тюзге санайма. Ол кертиси бла да иги командады, андан юч футболчуну бла баш тренерни Москвагъа академиягъа алгъандыла. Туугъан регионларында ойнап, битеу командаланы хорлаялсала, ол санда уа кеслеринден абаданыракъланы да, сабийле, кючлерине базынып, кеслерин эм кючлюлеге санап башлайдыла. Алай санга къажау быллай къарыулу къауумла турсала уа, ол оюм ашыгъышлы болгъанын, алыкъа кёп ишлерге кереклисин ангылайса. 

- 7-чи турда «Рамзан» академия бла матчдан сора сиз командагъа итиниулюк жетмегенин айтхан эдигиз. Анга кёре энди команданы психология жаны бла хазырлаугъа эс бурамысыз?

 - Биз къауумну психология халына къачан да къарагъанбыз. Алай эсе да, аны хатасындан къытдыргъан оюнларыбыз а болгъандыла. Бир-бирде чабыуда жеталмагъан, топдан бир жанына бурулгъан, аякъларын бир жанына кетерген 14-15-жыллыкъ сабийлени ангылаялмайма. Сиз бусагъатдача жаш энди бир заманда да боллукъ тюйюлсюз, деригим келеди. Аны ючюн а хар кюнде да тынгылы ойнарча къарыу табаргъа керекди. Топ мени бетиме окъуна тийсин, къабакълагъа кирмесин ансы, деп.

- Бу сезонда алай кёп хорламыгъыз болмагъанды, алай алчы къауумланы уа къытхансыз. Жауун челекден къуйгъанча жаугъанда, Махачкъаланы «Динамосун», «Волгарьны», «Динамо-СУОР-ну» артда къойгъансыз. Бу матчлада хорламла жорукъдан тышындачамы болгъандыла огъесе команданы тийишлисича хазыргъаныгъызны эсебимидиле?

- Психологияны юсюнден айта эсек, хау, ол тынгылы хазырланыуну эсебиди. «Юйде» биринчи матчларына спортчуларыбыз кёллери кётюрюлюп чыкъгъандыла, бу оюнлада къарыуларын аямагъандыла. «Къонакъда» «Динамо-СУОР» бла тюбешгенибизде да халыбыз алайыракъ болгъанды, алай насыбыбыз тутмагъанды, башда сагъыннганымча, былайда судьяладан да къалгъанды. «Волгарь» бла ахыр «юй» матчда ойнагъанбыз, сабийле хорларгъа бек сюе эдиле. Биринчи таймда оноулан болуп ойнагъанбыз, «къызыл» карточка ара къоруулаучубузгъа кёргюзтюлгенди. Былайда футболчуларыбызгъа ыразылыгъымы билдирирге да сюеме, ала бирликлерин, къатылыкъларын кёргюзтгендиле эмда хорлагъандыла.

Хар оюнну аллында тренерле къаууму алагъа тюз сёзле табаргъа, жарсыгъанларын кетерирге кюрешедиле. Бир-бирде уа, ма бу матчладача, аланы кеслерини базыныулукълары, итиниулюклери алгъа чыгъадыла.

Голланы къарындашына жоралагъанды

«Спартак-Нальчикни» 2007 жылда туугъан футболчуладан къуралгъан командасы ахыр матчында «Черноморец» бла ойнагъанды. Анда бизникиле, алгъа 1:0 эсеп бла къытдыра келип, ахырында хорлагъандыла. Команданы  къауумунда ойнагъан Ахмед Кумышев бу матчда эки гол ургъанды, аланы футболчу бюгюнлюкде мобилизациягъа къошулгъан къарындашына жоралагъанды.

Бу кюнледе эм иги футболчуну айырыу бла байламлы къол кётюрюу барады. Анда Ахмед алчы жердеди.