Сакъланнган хорламла, ёхтемлендирген такъыйкъала

Республикабызны спортчулары, округ, къырал, халкъла аралы эришиулеге къатыша, атларын айтдырадыла, хорламлары бла республикабызгъа да махтау келтиредиле. Муратларына жетиуде кертичиликлери, аланы толтурур ючюн къыйын сала билгенлери бла таматаланы къууандырадыла, ёсе келген тёлюлеге ахшы юлгю кёргюзтедиле. Бу материалда аланы талайын эсгертирге сюебиз.

Мусукаланы Исмайыл

Иван Ярыгинни, Россейни, Европаны, дунияны да чемпионатларында, континентле аралы кубокда майдалла къытхан Мусукаланы Исмайылны аты эркин тутушууну тарыхына киргенди. Уллу спорт жолу уа Хасанияда башланнганды, аны биринчи тренери Ажоланы Юсюп болгъанды. Артда Исмайыл усталыгъын Дагъыстанда ёсдюргенди, анда юйреннген кезиуюнде 2015 жылда россейли гёжефлени рейтингинде, эм кёп, 700 балл жыйып, биринчи болгъан эди. 

Хасаниячы спортчуну эм уллу хорламларындан бири уа кесини ауурлукъ къауумунда Венгриягъа Олимпиадада эркин тутушуудан эришиуге къатышыргъа эркинликни къоруулагъаныды. Эсигизге салайыкъ, талай жыл мындан алгъа ол, спорт гражданствосун тюрлендирип, бюгюнлюкде Венгрия ючюн эришеди. Тутушууну олимпиада тюрлюлерини «United World Wrestling» деген халкъла аралы федерациясы да жерлешибизни дунияны быйылгъы чемпионатында жетишимин жылда эм игиге санагъанды.

Локияланы Жамболат

Спорт жолун Тырныауузда башлагъан Локияланы Жамболат грек-рим тутушууда болдургъан жетишимлери бла белгилиди. Ол къыралны чемпионатларында эм халкъла аралы эришиуледе, Иван Поддубныйны мемориалында кёп кере хорлагъанланы эм саугъаланнганланы къауумуна къошулгъанды, Европаны, дунияны кубокларында майдалла къытханды, Европалы миллетлени кубогун алгъанды, Россейни спортуну халкъла аралы устасыды.

Спорт бла жети жылында кюрешип башлагъанды, биринчи уллу хорламы 2011 жылда Россейни кадетлени араларында биринчилигинде къытхан доммакъ майдалы эди. Эки жылдан ол къыралны юниор биринчиликлеринде кюмюш эм доммакъ майдалланы алгъанды. Быйыл да Жамболат хорламлары бла къууандыргъанды. Киров шахарда Сергей Миронович Кировну хурметине аталгъан эришиуде тёрт тюбешиуюнден биринде да къаршчы спортчулагъа бир баллны да ычхындырмагъанды, ол угъай, финалгъа чыгъар ючюн сермешинде Кировдан гёжефни – 4:0, ахырында уа Ульяновскну келечисин 8:0 эсепле бла хорлагъанды. Совет Союзну Жигити Александр Аксёновну хурметине Новосибирскде «Возрождение» деген эришиуге 8 къыралдан 200-ден аслам атлет къатышхандыла, анда жерлешибиз «кюмюшню» алгъанды. Красноярскда Олимпиада оюнланы чемпиону Алексей Шумаковну саугъаларына 40-чы битеукъырал эришиуде, Россейни Жигити генерал-лейтенант Роман Кутузовну хурметине аталгъан турнирде да Жамболат кесини ауурлугъунда эм кючлю болгъанды.

Гуппойланы Алина

Алина дзюдода, самбода, сумода, бел бауладан тутуп тутушууда жетишимлери бла атын айтдыргъанды. Быйыл а анга бел бауладан тутуп тутушуудан Россейни спортуну устасы деген ат берилгенди.

Спортну Алина сабийлигинден бери да сюеди, жараулагъа школда окъугъан кезиуюнден бери жюрюгенди. Бийик усталыкъ билим алыргъа В.М. Коков атлы Къабарты-Малкъар къырал университетге киргенди, дзюдо бла кюрешип анда окъуй тургъан кезиуюнде башлагъанды. Тренерле Олег Саральповда бла Мухамед Боготовда юйрене, республика, округ, къырал даражалы эришиуледе, битеуроссей эришиуледе бла Сауутланнган кючлени чемпионатында хорлагъанды. Самбодан турнирлеге да къатыша, саугъа жерлеге дайым чыкъгъанды, кесин сумода да сынагъанды, анда да жетишимли болгъанды. Бел бауладан тутуп тутушууну юсюнден айтханда, арт эки жылда Россейни чемпионатларында  доммакъ майдалланы къытханды. Алина кеси тренер болуп, сабийлени дзюдогъа бла гимнастикагъа юйретеди. Жашау жоругъуна уа берген сёзюне кертичиликни бла адамлыкъны санайды.

Аттасауланы Рамазан

Россейде, тыш къыралда да белгили гёжеф Аттасауланы Рамазан гитчелигинден башлап эркин тутушуу бла кюрешгенди, биринчи тренери уа Уяналаны Азрет эди. Ол талай кере Къабарты-Малкъарны чемпиону болгъанды, округ, битеуроссей турнирледе, спартакиадалада да биринчи жерлеге чыгъа тургъанды. 2015 жылда АБШ-ха кёчюп, мектепни да анда бошагъанды, усталыкъ билим а бизнес эм менеджмент жаны бла алгъанды. Таулу жаш тыш къыралны чемпионатында, битеу сермешлерин хорлам бла бошап, «алтынны» къытханды.

Туугъан жеринде узакъда болгъанлыкъгъа, Рамазан жууукъ-ахлуларын, тенглерин жокълагъанлай турады. «Миллетибизде тёлюлени араларында байламлыкъла къатыдыла, балала ата-аналагъа, аппала-аммалагъа бегирек тартыладыла, заман жетсе, алагъа кёз-къулакъ боладыла. Бизни адет-тёрелеребиз ариудула, алада кёп жылланы ичинде жыйылгъан акъыл-магъана барды, аланы унутургъа жарамайды. Жангызда бир бирге сакълыкъ, билеклик этиу нени тутады. Жюрегим бла сюйген жерим – туугъан, ёсген республикамды. Онг болуп, бери къайтыргъа, жашаууму мында, юйюрюм, жууукъ-тенглерим болгъан жерде къураргъа сюеме», - дейди.

Цийкъанланы Ислам

Жаш дзюдочу Цийкъанланы Ислам къатышхан эришиулеринде майдалсыз къалмаучуду. Быйыл да, алгъа жыллада да ол округ, къырал, халкъла аралы эриишуледе  болуп къайтханды. Алай бла Нижний Новгородда Россейни кубогуна къыралны 45 регионундан 380-нге жууукъ дзюдочу къатышхандыла,     аланы араларында Ислам (66кг.) да сынашханды. Айырыу эришиулерини тёртюсюнде  хорлап, финалда Хакасиядан Михаил Мамаев бла тюбешгенди. Сермешлерине берилген заманны ичинде ким кючлюрек болгъанын ачыкълар онг чыкъмагъанды. Къошакъ заманда, жерлешибизге эсгертиуле этилип, ол экинчи жерни алгъанды.    Красноярскда Иван Ярыгинни атын жюрютген спорт арада дзюдодан алтын эм тюрсюнлю темирле жарашдыргъан заводну директору Владимир Гулидовну хурметине аталгъан «А» класслы тёрели эришиуде «доммакъ» къоллу болгъанды. Россейде дзюдону мурдорун салгъан Василий Ощепковну херметине аталып, Хабаровскда «Платинум арена» арада «Russian Judo Tour» халкъла аралы турнирден да «кюмюшню» келтиргенди. Новокузнецк шахарны «Богатырь» спорт арасында Кузбассда дзюдону мурдорун салгъан адамладан бири - Александр Бебенинни хурметине аталгъан мастер битеуроссей эришиуде да экинчи болгъанды.