Студентлени бизнес бла кюреширге юйретирикдиле

Ючюнчю эм тёртюнчю апрельде   В.М. Коков атлы аграр университетде предприниматель болургъа юйретген тренингле  барлыкъдыла. Ала «Университетледе предпринимательствону мурдорлары» деген федерал проектни чеклеринде къуралгъандыла.

Битеуда Россейде бу проектге эки жюз университет къатышханды, тренингледе билимлерин ёсдюрген студентлени саны 85 мингнге жетгенди. Быллай иш бизни къыралда алыкъа жангыды, алай битеу дунияда уа студентлени башламчылыкъларына кёре бек кёп керекли, сейир ишле къураладыла.

Бизни университетибизни студентлерини устазы бу  жол Пятигорск шахарда къырал университетни ишчилеридиле: Юлия Головина эм Наталья Костенко.   Юйретиу оюн – эришиу  халда бардырылады.

Аграр университетде окъугъанла федерал проектни платформасында регистрация ётгенден сора, бизнес бла байламлы материалланы окъуяллыкъдыла,  регионда кеслери иш  къурап, файда тюшюргенле бла шагъырей боллукъдула. Технология жаны бла предпринимательле бусагъатда кёпден кёп болуп барадыла, хар жерде да адамланы ишлерин женгил этген амалла къураладыла, бир-бир жерледе уа машинала толусунлай битеу жумушланы тамамлайдыла.

Быллай тренинглени хайырындан Шимал Кавказда бизнес бла кюрешгенле бирлешедиле, бир  бирлерине болушадыла. Студентлени оюмларына тынгылагъан сынаулу бизнес – тренерле алагъа къайда тюз, къайда терс болгъанларын ангылатып, аланы  теркирек аягъы юслерине турургъа себеплик этерикдиле.