Гитче бизнесге себеплик этиуню къыйматлы амалы

РФ-ни Президентини СКФО-да толу эркинликли келечисини Аппараты, Шимал Кавказны ишлери жаны бла министерство, Округну субъектлерини араларында экономика байламлыкъланы ассоциациясы эмда Шимал Кавказны айнытыу корпорация (КРСК) гитче бизнесге себеплик этиуню жангы амалын къолгъа алгъандыла. Бу оноу сагъынылгъан министерствону кенгешинде этилгенди. Анга  министрни биринчи орунбасары Одес Байсултанов, РФ-ни Президентини Шимал- Кавказ федерал округда толу эркинликли келечисини орунбасары Игорь Бабушкин, КРСК-ны гендиректору Сергей Харитонов эм Ассоциацияны толтуруучу комитетини таматасы Заурбек Дзобелов къатышхандыла, деп билдиргендиле КРСК-ны пресс-службасындан.
Сагъынылгъан амалны 100 миллион сомдан учуз болгъан инвестиция проектлени тамамлауда хайырланыргъа боллукъду. Белгилисича, ахча да банк кредитча берилликди. Кеси да учуз процент ставкасы бла. Предпринимательлеге залог бла уа Ассоциация бла КРСК болушурукъдула.
- Быллай амалны кереклисин биз толу ангылайбыз. Нек дегенде гитче бизнесге, фермерлеге, энди къармашып башлагъан предпринимательлеге да, корпорация бла тюзюнлей ишлеген компанияладан эсе аз болушлукъ керекмейди. Толу эркинликли келечини аппараты бла министерство анга кёз-къулакъ боллукъдула. Керек болса ишни тирилтирге онг да табарыкъдыла, - дегенди Одес Байсултанов.
Аны бла бирге регионда субъектлени экономика планларын бир инвестициялы картагъа тийишдирир умут барды. Аны хайыры бла къоншу регионлада бирча бизнесни къураудан къутулургъа боллукъду.
   Кенгешге къатышханла быллай тюбешиулени терк-терк бардыра турургъа, аланы кезиуюнде СКФО-да экономика байламлыкъланы кючлендириу жаны бла жангы амалла табаргъа боллугъун да белгилегендиле.