Жангылыкъла

Россейде биринчи къагъыт ахчала жюрюп башланнганлы 250 жыл толгъанына жораланнган кёрмюч бу кюнледе Нальчикде Музыка театрда бардырылады.

РусГидро компанияны Къабарты-Малкъарда бёлюмюню келечилери, Росрыболовствону Запад-Каспий управлениясыны специалистлери бла бирге бу кюнледе Терк суугъа эмда анга къошулгъан черекчиклеге каспий лосось чабакъчыкъладан 300 мингден артыгъын жибергендиле. Саулай айтханда, быйыл компанияны себеплиги бла суулада аланы саны 700 мингнге, ахыр беш жылны ичинде уа эки миллионнга кёбейгенди, деп билдиргендиле бёлюмню пресс-службасындан.

«Россети Шимал Кавказ» компанияны Къабарты-Малкъарда бёлюмю «Каббалкэнергода» баланс комиссияны кенгешин бардыргъанды. Анда быйыл озгъан онбир айны ичинде ишни эсеплери чыгъарылгъандыла. Эм биринчиден, сёз электрокюч сетьледе къоранчланы азайтыуну юсюнден баргъанды, деп билдиргендиле компанияны пресс-службасындан.

Кёп болмай  «МФЦ КБР» къырал бюджет учрежденияны таматасы  Аслан Афаунов  Красногорск шахарда  «МФЦ 2.0: оюмладан ишге кёчюу» деген кенгешге къатышханды. Анда  Къырал эм муниципал жумушланы тамамлагъан кёп функциялы араланы айнытыуну амаллары сюзюлгендиле.   

Бу кюнледе Бахсан район жангы мобиль маданият ара - автоклуб алгъанды. Ол дизель генераторда ишлейди. Аны хайыры бла тюрлю-тюрлю концертле, байрамла бардырыргъа боллукъду. 

Дагъыда кёчюучю маданият юй кинозал да болалады. Интернети болгъаны себепли уа бардырылгъан байрамланы онлайн амал бла кёргюзтюрге онг чыгъады.

Бахсан районун башчысыны орунбасары Андзор Ахобеков айтханнга кёре, быллай кёчюучю маданият ара артистлени ишлерин женгиллендирликди. Ол энди районну эм узакъ эллеринде да байрамла, концертле бардырыргъа онг чыкъгъанын энчи чертип белгилегенди.

КъМР-ни энергетика, тарифле эмда жашау журтлагъа надзор этиу жаны бла министрини къуллугъун толтургъан Ирина Безникова республиканы Электрокюч бла ышаннгылы жалчытыу жаны бла штабыны кезиулю жыйылыуун бардыргъанды. Анда сёз къышны чурумсуз ётдюрюуню юсюнден баргъанды, деп билдиргендиле министерстводан.

22 декабрьде «Sky - club»  ресторанда (САК Галерея, Киров атлы орам, 10) «Поэзияны эки сагъаты» атлы жангы жылгъы музыкалы-адабият байрам бардырыллыкъды. 

Кёп бармай  «Демография» миллет  проектни чеклеринде Исламейни 4-чю номерли орта школунда  40 гитчеге ясли блок ачыллыкъды.  Анга жыл санларына кёре эки къауум жюрюрюкдюле.

Огъары Малкъарны эрттегили Сауту элинде   77 жыл мындан алгъа болгъан бушуулу  ишлени эсгергендиле. Белгилисича, ол зарауатлыкъ  1942 жылда 28  ноябрьден башлап 1 декабрьге дери баргъанды.