Солуу бийик даражада къуралырча

Къабарты-Малкъарда турист-солуу комплексни халын тинтиу тири тамамланады. Аны бла байламлы бу кюнледе Курортла эм туризм министерствону ишчилери Элбрус районну администрациясыны келечилери бла бирге къонакъбайлыкъ бла кюрешген организациялада бла ашханалада болгъандыла. Андан сора да, туристлени араларында ала мында болумланы жаратханларыны бла къалгъанларыны юсюнден соруу бардырылгъанды. Бу ишни битеу да специалистлени тёрт къаууму толтургъандыла, ала бир кюнню ичинде Азау эм Чегет талалада болумну сюзгендиле. 

 Къонакъ юйлени, ашханаланы, сатыу-алыу баргъан жерлени тизмесин жарашдырыу, алада болумну тинтиу республиканы Правительствосуну 2023 жылда 20 июльда чыгъарылгъан 342-чи буйругъуна кёре тамамланады. Ол мурат бла энчи ишчи къауум да къуралгъанды, анга Правительствону башчысы Мусукланы Алий (ведомствола аралы ишчи къауумну да таматасы), аны биринчи орунбасары Сергей Говоров, курортла эм туризм министр Мурат Шогенцуков, Нальчикни администрациясыны башчысы Таймураз Ахохов, промышленность, энергетика эм сатыу-алыу жаны бла министр Шамиль Ахубеков, Чегем районну администрациясыны башчысы Юра Борсов, СКФО-да Къырал статистиканы федерал службасыны управлениясыны башчысыны орунбасары Аурика Гаштова киргендиле. Ала 2023 жылда 1 сентябрьде Правительствода тамамлагъан ишлерини эсеплерин чыгъарыргъа керекдиле.