Кавказ душмандан азатланнганына атап

Орус география обществону башламчылыгъы бла, Кавказ немис-фашист ууучлаучуладан азатланнганына 80 жыл толгъанына аталып, «Кавказский рубеж – 2023» деген аты бла автопробег болгъанды. Патриот марафон жаш тёлюню Ата журтха сюймеклигин кючлеу, тарыхыбызгъа, тин байлыгъыбызгъа хурмет этерге юйретиу мурат бла ётдюрюлгенди.

 Автопробег Новороссийскде «Малая земля» комплексде башланып, Краснодар эм Ставрополь крайла, Адыгея, Шимал Осетия-Алания, Ингушетия, Къарачай-Черкес эм бизни республиканы жерлери бла ётеди, аны узунлугъу 2 минг километрден асламды. Делегацияны къауумуна Орус география обществону, Краснодар крайны Курортла, туризм эм олимпиада хазна министерствосуну эм Курортланы бла туризмни айнытыу арасыны, Новороссийскни таможнясыны келечилери киредиле. 

 Къабарты-Малкъарда ала Минги тауну къоруулауну музейинде болгъандыла, Элбрусну къоруулай ёлгенлени эсгертмесинде, шош туруп, жигитлени эсгергендиле. Сора курортда адамланы солуулары къалай къуралгъанына да къарагъандыла. Экинчи кюнде уа республиканы Курортла эм туризм министерствосунда тюбешиуге къатышып, Нальчикни ариу жерлерине экскурсиягъа атланнгандыла, Ёмюрлюк отха гюлле салгъандыла.

Кульчаланы Зульфия.