Аскерчилерибизге себеплик – баш жумушладан бири

«Единая Россия»  бла «Наша Правда» фонд энчи  аскер операциягъа керекли техника ашыргъандыла.  Болушлукъ аскерчи бёлюмледен келген тилеклеге кёре къуралгъанды.

Апрельден бери  «Наша Правда» фонд бла «Единая Россия» болушлукъну Донецк халкъ Республикада 1-чи аскер корпусха, 58-чи аскерге, хауа-аскерлени 4-чю армиясына, десантчылагъа, башха бёлюмлеге жетдиргендиле. Алагъа    квадрокоптерле,  дронлагъа къажау керекле, аскер оборудованиясы  бла машинала,   радиостанцияла, кийимле, кече болумну кёрюрге онг берген приборла эм кёп башха затла берилгендиле. Десантчылагъа уа   квадроциклле бла от тюшюулени ёчюлтюучю оборудование келтирилгенди.

- «Наша правда» фонд энчи аскер операциягъа керекли затланы сатып алыугъа 500 миллион сом къоратханды. Партияны себеплиги бла фронтха болушлукъ андан ары толтуруллукъду,-дегенди фондну башчысы   Александр Бровченко.

- Биз аскерчилеге бла кеслерини ыразылыкълары бла къуралгъан бёлюмлеге керекли затланы тапдыргъанлай турабыз. Ол санда атышыу баргъан къайсы жерге да жетип, жаралыланы чыгъарырча машинала,  квадроциклле да бардыла.    Дагъыда    радиостанцияла,  душманны дронларын заманында ачыкълагъан оборудование да келтирилгенди. Биз бёлюмлени командирлери бла дайым да сёлешгенлей, керекли затланы билгенлей турабыз, - дегенди партияны ара толтуруу комитетини башчысы  Александр Сидякин.

Аны айтханына кёре,   «Единая Россия» энчи операция башланнган кезиуден бери фронтха жети миллиард сом жыйгъанды. «Болушханлай турлукъбуз. Бизге  болум ючюн къайгъыргъан адамла эмда организацияла себеплик этедиле. «Наша Правда» аладан бириди, ол кёп болмай къуралгъанды, болсада Хорлам ючюн кёп магъаналы жумушланы толтургъанды»,-деп чертгенди   Александр Сидякин.

Эсигизге салайыкъ, партия фонд бла бирге ишлеуню юсюнден келишимни апрельде къабыл кёргенди. Аны чеклеринде аскерчилеге эмда жангы регионлада жашагъанлагъа керекле тапдырыладыла, ол санда медицина оборудование, дарманла, башха жандауурлукъ жюкле.

 «Единая Россия» СВО-ну биринчи кюнюнден Донецк эм Луганск халкъ республикалада бла Херсон эм Запорожье областьлада адамлагъа къайгъыргъанлай турады. Жангы регионлагъа 62 минг тонна жандауурлукъ жюк жетдирилгенди – аш-суудан башлап, дарманлагъа, къурулуш материаллагъа дери. Жангы регионлада партияны 45 жандауурлукъ арасы къуралгъанды, алада уа регионланы инсанлары соруула берирге, праволу эм башха болушлукъ алыргъа боллукъдула.

Партияны КъМР-де бёлюмюню толтуруучу комитетини башчысы, «Единая Россияны» регионда волонтёр штабыны таматасы    Дмитрий Парафилов   KABARDIN-BALKAR.ER.RU сайтха билдиргенича, КъМР-ни Башчысы - партияны регион бёлюмюню секретары Казбек Коков «муниципал сагъатлада» энчи аскер операциягъа къатышханлагъа болушлукъну юсюнден дайым да айтады.

-  Бу соруу магъаналыладан бириди. КъМР-ни Правительствосуну резерв фондундан  мобилизация бла чакъырылгъанлагъа тюрлю-тюрлю кереклени алыргъа 38 миллион сом бёлюннгенди. Партияны регион бёлюмю бизге болушхан организацияла бла бирге жандауурлукъ жюклени къурайды. Бу ишге партияны  депутатлары, жаш гвардиячыла, волонтёрла-медикле, республиканы инсанлары да къатышадыла. Партияны жамауат приёмныйинде аскерчилерибизге кереклени жыйгъанлай турабыз. Озгъан айда уа Мелитопольгъа ашыргъанбыз жюкню:  кийимле, суу, татлы ашарыкъла эм башхала. Ары дери уа Къырал Думаны депутаты Виктория Родинаны себеплиги бла   аскерчилеге жукъларча жерле берилгендиле. Школчуларыбыз а къоруулаучулагъа открыткала ишлейдиле, письмола жазадыла. Ма бу кюнледе уа 700 килограмм болушлукъ бергенбиз аскерчилерибизге: аш-суу, медикаментле,   электрогенератор эм башха затла, - дегенди Дмитрий  Парафилов.