Усталыгъын сюйгени учундурады аны

Устазлыкъны жюреклери бла сайлагъанлагъа къадар бере болур ол хунерликни, деригим келеди.  Ала битеу жашауларын школ бла байламлы этип къоядыла. Аккайланы(Герийланы) Мариям ма аллай устазладанды. Ол  Булунгуда туугъанды, школну да анда бошагъанды. Университетни бошаргъа  къадарын Герийланы Назир бла байлап, Жангы Малкъаргъа кёчгенди.  Бу  элни  школунда ишлегенли отуз жылдан атлагъанды.

Мариям бла мен узакъ озгъан жыллада Къабарты-Малкъар къырал университетде бирге окъугъанбыз. Билими терен болуучу эди. Кёп болмай бирге тюбеп, ушакъ этгенбиз, шёндюгю окъуучуланы адеп-къылыкъларыны юсюнден да сёлешгенбиз.   Устаз сохталарына айып салдырмады. «Элде ёсгенлери ючюн тюйюл эсе, адеплиле, намыслыла, ариу къылыкълыладыла.  Атала, анала  бла да байламлыгъыбыз игиди. Элде бир бирни танымагъан, билмеген жокъбуз, аны себепли болур,  ата-ана, сабий, устаз да бир бирни ангылайбыз»,- дейди.

Ол аны не зат бегирек жарсытханын да айтады. «Тилибизни иги билмеген сабийле кёпдюле. Анда уа ата-аналаны, бизни да терслигибиз  асламды деп, алай къарайма. Таулу юйюрледе кеси тилибизде сёлешмегенлери бек жарсытады.  Ма ол шартха эс бурургъа керекбиз»,-дейди.   

Устаз ол халны тюзетирча амалладан бирин а  ана тилде дерслени кёбюрек этиуню санайды, устазлагъа бу ишде уллу магъана береди. «Устазым Баштакъланы Фатимат Хаджи-Муратовна  уллу хурмет этген адамым болгъанлай къалгъанды. Биз аны дерслерин ашыгъып сакълаучубуз эсимдеди. Ариу, сабыр ауазы бла дерс берип башласа, чибин учханны эшитиучю эдик. Аллай бир сюйдюргенди ол  бизге малкъар тилни.  Тилибизни байлыгъына тюшюндюргенди, ата-анагъа, жерибизге сюймекликни  туудургъанды.  Аны дерс бергени дайым биргеме барады»,-дейди.

Мен кесим билип, Мариямны окъуучулары  республикада олимпиадалагъа, кёп башха   эришиулеге   къатышханлай турадыла, алчы жерлени да аладыла.      Жангы Малкъарда  тюрклюле кёпдюле. Эришиулеге Мариям тюрклю сабийлени да дайым  къошады, ала да атларын иги бла айтдырадыла. Аны айтханым, устаз аты-саны болсун деп бардырмайды дерслерин. Хар сабий кеси тилинде оюмун, акъылын билирге итинеди. Аны ючюн а кесини эм башхаланы да сынамларын  хайырланады.

Ёсюп келген тёлю адепли болуруна да къайгъырады.  Ариулукъну, огъурлулукъну, тюз ниетлиликни  гитчеликден акъылларына сингдирир ючюн къадалып кюрешеди. Сабийлени малкъар тилни билирге сейирлери болгъанларына аз кере шагъат болмагъанбыз. Ол а бек магъаналы шартды.

Мариям бла ушагъыбызда жашауну юсюнден да хапар айтханбыз. Ол къайын атасын бла анасын жылы сёзле бла сагъыннганды, алагъа ыразылыкъларын билдиргенди. «Ала болмасала, ишде, юйде да хазна жетишаллыкъ болмаз эдим. Не затыма да жарагъандыла, себеп болгъандыла, жаннетли болсунла»,- дейди.

Ишин бек сюйгени уа аны учундурады.  Малкъар адабиятдан 5-чи классха дерслик китапны жарашдыргъанланы къауумунда ишлегенди.  Аны къурашдыргъан  билимли эмда хунерли устазланы  санында айырмалы болуп,  иги къошумчулукъ этгенди. Энди ол китап бла республиканы школларында   хайырланадыла.

Мариям  кёп тёлюню  узун да, кенг да жолгъа  ашыргъанды. Аланы хар бирини юсюнден да биледи, жетишимлерине къууанады.  Кеси да да иши бла махтау алады: КъМР-ни Башчысыны Ыспас къагъытына,  КъМР-ни Жарыкъландырыу эмда илму министерствосуну,  билим бериуню район управлениясыны  грамоталарына, дипломларына кёп кере  тийишли болгъанды.

Аны юйюр жашауу да къуралгъанды, баш иеси бла эки къыз ёсдюргендиле. Ала устазлыкъны сайламагъандыла, алай ишлеген жерлеринде атларын иги бла айтдырадыла. Джамиля телевиденияда  кюн сайын  республиканы  жамауатына жангылыкъланы билдиреди. Лейла уа фармацевт болуп ишлейди.