Болатны умутландыргъан атламлары

Сабийни фахмулугъу гитчелигинден окъуна ангылашынады. Улбашланы Болат да аллайдан бириди деп айтыргъа боллукъду. Ол 2012 жылда Улбашланы Азаматны бла Асиятны юйюрлеринде туугъанды. Бусагъатда Нальчик шахарны 9-чу номерли школунда окъуйду, фортепианода согъуп беш жылындан бери кюрешеди. Аны ючюнчю номерли Сабий музыкалы школну устазы Людмила Хатукова юйретеди.

Болатны фортепианода согъаргъа юйренирге атасы элтген эди. Азамат кеси врачды, аны себепли адамны саулугъуна хайырлы затладан ангылауу уллуду. Сёз ючюн, фортепиано ол мыйыны эки кесегини да бирча иги ишлеуюн себеплик этеди.

Болатны чыгъармачылыкъ жолу биринчи 2017 жылдан башланнганды дерге боллукъду: ол жыл «Кюн шахар» сабий академияны «Искорки» ансамблине тюшгенди. Анда «Ансамбльде тири чыгъармачылыкъ иши ючюн» деген грамота бла саугъаланнганды.

2019 жылда «Лазурная волна – Сочи 2019» деген халкъла аралы музыкалы чемпионатда «Эстрадное пение» номинацияда биринчи жерни алгъанды. Арт эки жылда да Болат бу конкурсну алтын майдалларына тийишли болгъанды.

2019 жылда ноябрьде Нальчик шахарда ётген «Созвездие дружбы» халкъла аралы конкурсда «Эстрадалы жырчы» номинацияда экинчи жерни алгъанды. Ызы бла сабий чыгъармачылыкъны Грозный шахарда бардырылгъан «Фахмулулагъа жол-2021» халкъла аралы фестиваль-конкурсуна къатышханды. Анда фортепианода (соло) согъуу жаны бла диплом къоллу болгъанды.

2022 жылны февраль айында уа Болат, Софья Яганова бла бирге, фортепианода сокъгъан ансамбльча, «Къабарты-Малкъар - шуёхлукъну жагъасы» деген алтынчы регион фестивальда гитче жыл санлыланы къауумунда «музыка инструментледе согъуу» деген номинацияда 1-чи даражалы дипломну алгъандыла. Дагъыда ол жыл апрель айда дистанция халда ётген «Весенняя капель» деген экинчи халкъла аралы конкурс фестивальда Софья бла бирге 9-10-жыллыкъланы къауумунда «Инструментальный жанр – фортепиано» номинацияда гран-при алгъандыла.

2022 жылны май айында уа Ставрополь крайда Сабий музыкалы школланы эм сабий искусстволу школланы араларында бардырылгъан регион конкурсда Улбашланы Болат бла Софья Яганова лауреатланы 1-чи даражалы дипломларына тийишли болгъандыла.

Болат дагъыда жюзерге юйренеди, дзюдогъа, компьютер технологияла курслагъа жюрюйдю, тау лыжалада, скейтбордда, роликледе да учаргъа сюеди.