Ариулукъну багъалап, белгили визажист болургъа

 Республикада эм белгили визажистледен бири Эркенланы Заринады. Ол кесини студиясын ачханды, анда къызланы къууанчлы кюнлерине хазырлагъанындан тышында, сюйгенлени кесини усталыгъына да юйретеди. Зарина Къазахстанны Алма-Ата шахарында туугъанды, анда ёсгенди. Алгъа Алма-Атада Къазах-Америкалы университетни тауусханды, финансист усталыкъны алгъанды, банклада, къурулуш компаниялада уруннганды. Визажгъа уа Къазахстанны визажистлерини ассоциацияларыны президенти Диля Абдуллаевада юйреннгенди. Бийик билимни башха жаны бла алгъан эсе да, ариулукъгъа, визажгъа сейири къачанда болгъанды, сора анга ол къыйын бир заманда да кёрюнмегенди. Алай бла акъырын-акъырын айный, усталыгъын ёсдюре баргъанды.    

Къазахстанда аны юйюрю кёчгюнчюлюкден сора къалып къалгъанды. Ата-бабалары Чемалган (Шималгъан) элге тюшген эдиле, бусагъатда жууукълары Алма-Атада жашайдыла. Зарина анда тургъан къарачайлыла бла малкъарлыла бир бирлери бла шуёхлукъну бек къаты жюрютгенлерин,  Къазахстанны президенти бизни халкъларыбызгъа бек иги болгъанын, андагъы миллетлени барысына да энчиликлерин сакъларгъа себеплик этгенин белгилейди. Къыралны халкъларыны ассамблеясында къарачай-малкъар диаспора да ишлейди.

Беш жылындан башлап Зарина миллет тепсеулерибизге юйреннгенди, анда «Минги тау» ансамбльде тепсей, кёп къыраллада болгъанды. Бери концерт программа бла келгенди, «Балкария» ансамбль а алада къонакъда болгъанды.  Мында къалгъанына Зарина сокъураннганмагъанды, республикада турмушну жаратады, адамлагъа да юйреннгенди. Кёп башха миллетлени келечилерин, сёз ючюн, къабартылыланы мында биринчи кёргенме, дейди. Адам ол неда бу миллетденди деп айырмайды, шуёхлукъ жюрютеди.

Визажда сынам жыяр ючюн, алгъа салонда ишлегенди. Акъырын-акъырын аны юсюнден билгендиле, сёлешип, чакъырып башлагъандыла. Бирле хорлам угъай, къатышыу керекди дейдиле. Зарина алай сунмайды, бош къатышып неда кенгден къарап тургъан аны жашау жоругъу тюйюлдю. Алчы болургъа, энчилигин кёргюзтюрге кюрешеди.

- Тою боллукъ къызны хазырлаугъа бир сагъат кетиучюдю. Былайда халат этерге жарамайды, ала барысы да манга энчи клиентледиле. Алагъа керек болса, ишге солуу кюнледе да чыгъыучума. Багъаланы юслеринден айтханда, келинликлени 3.500 сомгъа бояйбыз, байрам ингирге уа - 2000 сомгъа. Былайда бу башхалыкъны сылтауун ангылатыргъа сюеме: хайырланылгъан косметика барысы да игиди, багъалыды, учузун алгъан да этмейбиз. Алай келинликлени бек багъалы «Аrmani», «Gerlain» дегенча люкс косметика бла бояйма, аланы мындагъы тюкенледен алмайма, тыш къыралладан келтиреме. Кисточкаларыбызны багъалары 5-6 мингден озгъан окъуна этеди. Сёзсюз, аллай макияжны багъасы учуз болур амалы жокъду, - дейди ол.

Адамны териси къургъакъ неда асыры жаулу болса, къыйыныракъ тюшеди, аны ючюн визажистге келирден алгъа тиширыу хазырланыргъа, тазаларгъа, кремле жагъып жумушатыргъа керекди. Кёзге кёрюннген кемчиликлени уа анда кетерликдиле, женгиллик берирге, бояу аз болгъанча кёргюзтюрге, жашыракъ кёрюнюрча этерикдиле. Кёп къызла визажист аланы юйлерине барып бояса, сюедиле, Алай сьудияда адамны ариу боярча битеу онгла къуралыпдыла, отоу жарыкъды, уллу кюзгюле салыныпдыла. Адамланы юйлеринде аллай онгла болмаучудула, сора тойну аллында къайгъы кёп болады, ол а специалистни да чырмайды, къызны да бир кесек апчытады. Былайда бир затны эсгертирге да боллукъ эди: суу, лак чачылгъанда ол бетине жагъылмазча макияждан алгъа прическа этилсе, игиди. Тазалыкъгъа да уллу эс бурулады, хар кисточканы, спонжикни жууадыла, энчи растворла бла дезинфекция этедиле.

- Визажистлени школун ачар ючюн, кесинг визажист болгъанынг азлыкъ этеди. Аны ючюн Голландияда Амстердамда «make up» студияда окъугъанма, преподаватель иш бла кюреширге эркин этген документни алгъанма. Менде окъугъанла курсладан сора мени кесими авторский сертификатымы бла халкъла аралы дипломну аладыла. Эки курсубуз барды: «базовый» эм «кеси кесиме визажист». Экинчисине выпускниклерим юйретедиле. Биринчисин а кесим бардырама, анга бир кесек теория (визажда ол артыкъ бек керек тюйюлдю, сора сюйген теория жаны бла билимин Интернетни юсю бла толтураллыкъды) киреди, аслам заман а практикагъа бериледи. Курс 13 кюнню барады: дерсле хар кюнден да тюшде онекиден ингирде алтыгъа дери барадыла. Модельлени кеслери келтиредиле. Алгъа мен кесим сайлагъан модельни бояп кёргюзтеме. Бу жумушха ариу бетли, башхача айтханда, бусагъатда ариулукъну стандартларына келишген тиширыуланы сайлаучума.  Сохталарыма алай тынчыракъды. Бетинде кемчиликлери болгъанла бла къалай ишлерге кереклисине уа артда тюшюндюреме, - дейди Зарина курсларыны юсюнден айта.

Тойгъа, байрам ингирге угъай, хар кюннгю жашауда къызла къаллай косметиканы хайырлансала игиди, багъа не болургъа керекди, нени уа учуз алыргъа да жарарыкъды деген соруубузугъа Зарина былай жууаплайды: «Мен хар заманда да айтама, косметика багъа болмагъанлыкъгъа, аман тюйюлдю деп. Сёз ючюн, тушьну, подводканы, помадаланы, карандашланы Max Faktor, ЕVA, Loreal, Mаybelline дегенча, артыкъ багъа болмагъан фирмаладан алыргъа жарарыкъды, ала бетге, териге заран келтирлик тюйюлдюле.  Алай кремле, пудрала, тональныйле уа багъалы брендледен, юлгюге, Chanel, Dior, Gerlain дегенча фирмаладан болсала игиди. Аланы терини керекли микроэлементле, витаминле бла жалчытхан, кюнню заранындан сакълагъан комплекслери бардыла, кеслери да бетни къартайтмай, жашлыгъын сакъларгъа болушурукъдула. Ахырында айтырыгъым, эриши адамла жокъдула. Алай, мен оюм этгенден, хар тиширыу да тизгинин жыяргъа, хар кюнден да бираз косметиканы хайырланыргъа керекди. Ол аны ариулугъун кючлерикди, анга къараргъа хычыуун боллукъду».