Телефон бла алыргъа боллукъ билдириуле

Пенсия фондну регионда Баш управлениясыны пресс-службасындан билдиргенлерине кёре, фондну регион бёлюмлерини «исси телефонларына» неда бир контакт-арасына сёлешгенде айтырча «код» сёзню хайырланадыла. Аны болушлугъу бла инсанны энчи данныйлери бла байламлы информацияны, сёз ючюн пенсияны ёлчеми, социал тёлеулени, счётуну болумуну, аналыкъ капиталдан къаллай бир ахча къалгъаныны юсюнден билирге боллукъду.

Эсигизге салайыкъ, пенсия эм социал соруула бла байламлы информацияны бир контакт арагъа эм фондну специалистлерине телефон бла сёлешип алыргъа жарайды. Алай инсанны энчи данныйлери бла байламлы информацияны операторла жангызда аны ким болгъанын тохташдыргъандан сора айтадыла. «Код» сёзню салгъандан сора ол информацияны тынчыракъ алыргъа боллукъду. 

Адам заявленияда жазылгъан телефон номеринден сёлешген эсе, къошакъ билдириуле изленирик тюйюлдюле. Башха номерден сёлеше эсе, паспортну бла СНИЛС-ни данныйлерин айтыргъа тюшерикди.

«Код» талай харфдан неда тарихден къуралыргъа, бир эм талай сёз, сёз тутуш болургъа боллукъду. Инсан бир ауукъ замандан аны алышындырыргъа эркинди. «Код» сёзню фондну сайтында энчи кабинетни юсю бла онлайн халда неда клиент службагъа келип тохташдырыргъа онг барды. Консультацияны контакт арагъа 8-800-600-0000 номер бла эм фондну «исси телефонларына» сёлешип алыргъа боллукъду.