Кюз артыны аламат жыйымдыгъы

Миллет музейде  Къабарты – Малкъарны Суратчыларыны биригиую къурап, «Кюз – 2022» деген тёрели кёрмюч  ачылгъанды.Анда жюзден артыкъ иш барды. Бояулу суратла,  кийиз, чеканка, эмаль, агъачдан, темирден этилген затла – барысы да къараучуланы сейирсиндиргендиле.

Кёрмючню ача туруп, КъМР-ни культура министри Мухадин Кумахов  кёрмюч бек бай болгъанын чертгенди, ол бизни республикада бусагъатда бек фахмулу суратчыла жашагъанларына шагъатлыкъ этеди, дегенди. Суратчы Мухадин Кишев а: «Битеу чыгъармала да башха тюрлюледиле, бир бирлерине ушамайдыла, хар устаны кесини хаты, жолу, энчилиги эсленедиле», - дегенди.

Жетмиш суратчы къатышхандыла кёрмючге.  Нарт эпосха жораланнган къабарты графиклени ишлери да кёзге илине эдиле. Битеу да кёрмючню арасында  баш иш а фахмулу скульптор Черкесланы Тахирни агъачдан жонулгъан «Апсаты» деген иши уа энчи эди, ариу бетли, сакъаллы, юсюнде жамычысы бла Апсаты керти да бу залгъа киргенча.

Акъкъызланы Сияраны  бла Имараны, Ахматланы Леуанны, Акъкъызланы Керимни ишлерин да кёрюрге боллукъду мында.

Дагъыда энчи белгилерча бир сурат барды: Александр Янинни «Чыпчыкъла учуп кетгендиле» деген иши. Янин жангыз къалгъан аппаны  бла ыннаны суратлагъанды, бетлеринде абызырагъанлары, балаларына термиле, тансыкъ бола жашагъанлары жазылыпды.

Огъары Малкъарны уа Абайланы Асият суратлагъанды. Баям, аныча тауланы алай терен сезген эм сюйген кёп адам болмаз.  Ол  жылла бла Малкъарны суратлап тургъанлыкъгъа, тоймайды тауладан, алагъа жангыдан къайтханлай турады, хар жолдан бир жангы зат таба.

Андрей Колкутинни «Циркде» деген иши да бек сейирликди, бу суратчыны бир башха бла алышындырыргъа онг жокъду, хаты кимге да баямды. Руслан Мазлоевни «Композиция» деген арджени къалпакъгъа да, тенгизге, къадарны айланч жолларына да ушайды.

Задин Мготловну «Сольфеджио» деген суратында къызчыкъ жырлай турады, анга къарагъанынгда бусагъатда макъамны эшитип башларыкъча, алай кёрюнеди, аллай бир жашау барды бу ишде.

 Мокъаланы Динаны «Гижгит» деген кийизинде къаяланы бла сууну ёмюрлюклери, бийликлери, жашырын кючлери сезиледи. Моргъул, кёксюл бояула табийгъат  къалай тынчайып тургъанын баямлайдыла. 

Кёпдю сейир зат бу кёрмючде, барып къараргъа, къууаныргъа керекди ансы.