Тазалыкъгъа къошумчулукъ

Бу кюнледе Къабарты орамда «Периметр» чыгъармачылыкъ майданда «Жаш адамла табийгъатны сакълауда» деген акция бардырылгъанды. Аны къурагъан Батырбекланы Джамиля косметолог  нёгерлерин косметикаларындан къалгъан-къулгъанланы башха-башха жыяргъа чакъыргъан эди. Анга  «Экологистика», шахарны айнытыуну «Платформа Нальчик» институту, «Деловая Россия» жамауат организация себеплик этгендиле. 
Ол кюн акциягъа кошулургъа сюйгенле юйлеринде неда ишлеген жерлеринде жыйылгъан пластик орунланы жыйып келтирирге эркин эдиле. Акцияны башламчылары алагъа саугъала къурагъандыла.  
– Биринчи атламыбыз - ариулукъ бла кюрешген индустрияны пластмасс орунланы бош алай атып къоймазгъа юйретиудю. Мени оюмума кёре, аладан башласакъ, башха организацияла да бизге къошулургъа сюерикдиле, – дегенди  Джамиля.
КъМР-де къалгъан-къулгъанланы жыйыу ючюн  жууаплы болгъан  регион оператор – «Экологистика» ООО да бу изеуге  келген эди. Аны баш  директоруну болушлукъчусу Елизавета Хакунова айтханнга кёре, ала адамла келтирген пластикни жыярча орунну келтиргендиле. 
– Республикада къалгъан-къулгъанланы эм пластикни энчи жыйгъан тёре жокъду. Бу ишни  баш магъанасы – бизде, башха жерледеча, пластикни жыйгъандан сора да, аны экинчи да къалай хайырланыргъа боллугъуна  тюшюндюрюудю, - дегенди  Елизавета Хакунова.
Дагъыда келгенлеге КъМКъУ-ну «Жашил дозоруну» экоактивистлери лекция окъугъандыла. Полиграфияны устасы Наталья Горностаева уа хайырланылгъан къагъытны жангыдан жарашдырыуну юсюнден мастер-класс бергенди.