Минги тауда бардырылгъан «Таза тау» тёрели акция быйыл уллу экология фестиваль халда ётгенди. Тау этеклени кир-кипчикден ариулагъандан сора да, анда экинчи кере жарашдырыргъа жараулу затланы башха-башха жыйыу жаны бла мастер-классла, экологияны сакълаугъа жораланнган лекцияла, «ишчи» оюн къуралгъандыла.
Кир-кипчикни жыйыугъа 350-ден адам къатышханды. Аланы асламысы Элбрусха республиканы Курортла эм туризм министерствосуну болушлугъу бла жетдирилгендиле. Нальчикден Минги тауну тийресине аланы хакъсыз элтгендиле. Тазалау жумушла жыл сайын 3500 метр бийикликде, альпинист ышыкъланы тийрелеринде, толтуруладыла. Волонтёрланы талай къаууму, «Азау-Чегет» экожол бла барып, Минги тауну агъачлы кесегин да ариулагъандыла. Росприроднадзордан билдиргенлерича, быйыл тау этекледен 50-ден аслам тонна багуш чыгъарылгъанды.
Мастер-классланы кезиулеринде уа алыкъа школгъа жюрюмеген сабийчиклени кир-кипчикни айыра билирге, агъачдан тюрлю-тюрлю жаныуарланы, затланы сыфатларын жонаргъа, ташлада суратла ишлерге юйретгендиле. Таматаракъла уа экология оюнлагъа къатышхандыла, ууакъ этиучю бла термопрессде пластик башладан жангы затла къалай жарашдырылгъанларына къарагъандыла, эковикторинада билимлерин кёргюзтгендиле, ски-пассла эм Минги тауну белгилери бла саугъала ючюн эришгендиле.
Абаданлагъа уа «Россейли экология операторну» спикерлери Андрей Рудневни бла Светлана Ризвунну эковолонтёрствону бла жаш адамлагъа аталгъан программаланы юслеринден лекциялары сейир болгъанды. «Экологистикадан» Диана Мурзаханова да кир-кипчик жыйылгъан жерлени полигонладан не башхалыкълары болгъанын ангылатханды.
Фестивальны «Кавказ.РФ» общество республиканы курортла эм туризм министерствосуну, Россейли экология операторну, «Экологистиканы» регион бёлюмюню, «Альпиндустрия» тау клубну эм «Эльбрус» сууланы чыгъаргъан компанияны себепликлери бла къурагъанды.
