Кенг да, жарыкъ да «Кюнчюк»

Нальчикни Дубки тийресинде 5-чи номерли  «Кюнчюк» сабий садны мекямы кёп жылладан бери да тарлыкъ этип тура эди. Эки жыл мындан алгъа уа анга къошакъ мекям ишленип башланнган эди да,  быйыл  толусунлай хайырланылыргъа берилгенди. Аны отоулары жарыкъдыла, жылыдыла. Юйню ичинде  уа къабыргъалада тюрлю-тюрлю жомакъланы жигитлерини суратлары кёзню къууандырадыла. Мен ары баргъан кюн бир къауум тиширыу клумбаланы тёгереклеринде ташларына тюрсюнлю бояула жагъа, эр кишиле уа тёммекчиклени кесип, аладан столчукъла,  шинтикчикле  жарашдыра тура эдиле.

Бу сабий садха жюрюген балачыкъла  республикада, шахарда бардырылгъан тюрлю-тюрлю байрамлагъа  терк-терк къатышадыла. Ол а  мында  аланы кёп жаны бла айнатыу бла байламлыды. Аны себепли  къызчыгъын, жашчыгъын бу садха берирге сюйгенлени саны да асламды. Анга да къарамай, бек биринчи бу тийреде жашагъанланы балаларын аладыла.  «Кюнчюк» деп   садыбызгъа нек атагъаныбызны билемисиз?  Биз  анга бу атны бошдан атамагъанбыз,  бек биринчиден бизни бек уллу байлыгъыбыз – сабийлерибиздиле да- андан. Дагъыда балачыкъла бизни гитче кюнчюклерибиздиле, биз алагъа мында хар зат да не жаны бла да тап болурча этер ючюн, къолдан келгенни аямайбыз. Ма бу аламат мекямны иелери да ала боллукъдула. Бу сабий сад Нальчикде бек игиледен бири боллугъуна  бир да ишекли болмагъыз»,-дейди Лидия Азикова.

Бу кюнлеге анда хар зат да тап халгъа келтирилип, омакъ этилгенди. Балачыкъла жатарыкъ ундурукъланы иги кесеги алышындырылгъанды, алагъа салыннган жастыкъ, жууургъан, тёшек тышла да  жангыладыла. Аны алайлыгъына кесибиз да шагъат болгъанбыз. Мекямны ичинде хар  жерде да тазалыкъ,  тизгинлилик кёзге  кёрюнеди, алада битеу  керекли затла  бардыла. Ары жюрюрюк къызчыкъла бла жашчыкъла  музыкагъа ана тиллеге да юйренирикдиле, спорт  бла да кюреширге, саулукъларын кючлендирирге да аланы онглары боллукъду. Арбазда уа, къайры  къарасанг да, тёгерекге къууат берген баннерле, гюл бахчала, солуу, ойнау майданчыкъла…