Профессионал байрамларын белгилейдиле

Тюнене Россейни От тюшюуге надзор этиу органына 95 жыл толгъанды. Аны къурауну юсюнден бегим 1927 жылда чыкъгъан эди. 2001 жылдан бери уа ол РФ-ни МЧС-ни къауумуна кийирилгенди.

Надзорну баш борчлары от тюшюулени болдурмаугъа себеплик этиу, аланы кезиулеринде къоранчланы азыракъ этиу эм адамланы ёлюмден къутхарыуду. Бюгюнлюкде ол тынгылы жалчытылынып ишлеген органды. От тюшюуле бла байламлы болгъандан тышында да ала халкъны къыйын болумладан къутхарыу жумушлагъа да тири къатышадыла.

Арт жыллада республикада от тюшюуле азыракъ болгъанлары къууандырады. Шёндю надзор органнга Мухамед Хажикаров башчылыкъ этеди. Мунициапал къуралыулада аны къолунда 56 инспектор ишлейдиле. Алагъа бойсуннган объектлени саны уа бюгюнлюкде 23 мингнге жетеди. Юсюбюздеги жылда ала план бла 236 объектде тинтиу бардырыргъа борчлудула. Аладан 157-де бюгюнлюкде надзор ишле ётгендиле. Дагъыда пландан тышында инспекторла 52 объектде болгъандыла.

РФ-ни МЧС-ни КъМР-да Баш управлениясыны пресс-службасы билдиргеннге кёре, озгъан алты айны ичинде от тюшюуден сакъланыуну жорукъларына 2300 бузукълукъ этилгени тохташдырылгъанды, 134 предписание этилгенди эм 200 адам административ жууаплылыкъгъа тартылгъандыла.

Энчи эс адамла аслам жыйылгъан жерлеге, билим бериу эм саулукъ сакълау объектлеге бёлюнеди. Инспекторла школчула бла тюбешедиле, тематикалы конкурсла бардырадыла,  эллиле эм шахарчыла бла ушакъла бардырадыла. Андан тышында да, инспекторланы борчларына от тюшген жерледе болуп, аланы сылтауларын да тохташдырыу киреди. 

-  Надзор органны ветеранларын эм бюгюнлюкде ишлегенлени да байрамлары бла алгъышлайбыз. Къыйын ишни сайлагъандыла да, бет жарыкълы уруна, юйлерине сау жыйыла ишлесинле,- деп чертгенди ведомствону пресс-секретары Кантемир Беров.