Солугъандыла, ойнагъандыла, жангы билим алгъандыла

«Кавказ» санаторийде бюгюнлюкде республиканы битеу районларындан да сабийле солуп, саулукъларын игилендиредиле. Бу кюнледе уа алагъа къонакъгъа жолда жюрюуню къоркъуусузлугъуну инспекторлары, МЧС-ни келечилери бла от ёчюлтюучюле  келгендиле. 

Санаторий 5   окъутуу-юйретиу майданнга юлешиннгенди. Аладан биринде къутхарыучула жашчыкъланы бла къызчыкъланы къоркъуусузлукъну  жорукъларына юйретгендиле, табийгъатда кесинги къалай жюрютюрге кереклисини юсюнден ушакъ  бардыргъандыла. От бла ойнаргъа жарамагъаныны, гитче хылиден уллу хата тюшерге боллугъуну  юсюнден да айтхандыла. Дагъыда МЧС-ни болушлугъу керек болгъан кезиуде энчи службаны къалай чакъырыргъа, от къабыннганда къаллай жорукъланы толтурургъа кереклисине да юйретгендиле.

Экинчи майданда уа сууда къоркъуусузлукъну юсюнден баргъанды сёз. Инспекторла  черекледе, кёлледе жуууннган кезиуде сакълыкъны юсюнден айтхандыла эмда сабийлеге юйретиу китапчыкъла юлешгендиле.

 Къыралавтоинспекторла уа жолда белгилени, светофорну магъаналарын ангылатхандыла, жаяу баргъан кезиуде жолдан къалай ётерге жарагъанын эсгертгендиле. Аякъ машинада, самокатда жюрюген кезиуде жорукъланы энтта бир кере эсгертгендиле. Инспекторла сабийлени ДПС-ни машинасы бла шагъырей этгендиле. Жашланы бла къызланы аны болумун кёргенден сора, солугъанла барысы да эшитирча, жолда сакъ болургъа чакъырыуланы айтхандыла.

 Къонакъла жаралы болгъаннга биринчи болушлукъ бериуню низамына да юйретгендиле. Тёртюнчю майданда орнатылгъан тренажерда жюреги тохтагъан  адамгъа реанимация жумушла къалай толтурулугъанларын билдиргендиле. Жараланы тюрлюлерин ангылатып, аланы тюз байларгъа юйретгендиле.

 От тюшюуге къажау-къутхарыу техникагъа уа, хар замандача, сейир артыкъда уллу болгъанды. Бешинчи майданда от ёчюлтюучюле  машиналарын кёргюзтгендиле, къаллай борчла толтургъанларын айтхандыла.  Сабийлени  къутхарыучулагъа соруула берирге онглары болгъанды, дагъыда ала от ёчюлтюучюлени формаларын кийип да кёргендиле. Ахырында уа къутхарыучула жалгъан отха кёмюк къуюп,  сабийлеге бютюнда зауукълукъ бергендиле.

Сёзсюз, быллай тюбешиуле  сабийлени эслеринде къалып, аланы къоркъуусузлукъну жорукъларына, сакълыкъгъа юйретирикдиле.