Байламлыкъда ишлеуню къыйматлыгъы баямды

Къабарты-Малкъар университет Луганск къырал  педагогика  университетни (ЛГПУ)стратегиялы  партнёру деген  даражагъа тийишли болгъанды. Аны юсюнден бизге КъМКъУ-ну пресс-службасындан билдиргендиле.

Алгъаракълада РФ-ни илму эм бийик билим бериу министри Валерий Фальковну буйругъу бла арада байламлыкъ жюрютюуню юсюнден  келишим этилгенди. Ол тюзюнлей халда  ётенди.  Анга КъМКъУ-ну ректоруну къуллугъун толтургъан, профессор  Юриий Альтудов бла ЛГПУ-ну ректору, Луганск Халкъ Республиканы депутаты Жанна Марфина къатышхандыла. Энди вузла   быйыл жангы окъуу  жылдан башлап   «Двойной диплом» программада белгиленнген план бла  ишлеп тебирерикдиле.  

 Жангы программагъа кёре, тюрлю-тюрлю бёлюмледе къысха байламлыкъ жюрютюллюкдю. Ол санда квалификацияны ёсдюрюуде, кадрланы  хазырлауда, стажировка бардырыуда, электрон билим бериуню бла  китапхананы айнытыуда, илмуда, жаш тёлю политиканы къурауда, жай школланы ётдюрюуде да.  Андан сора да,  специалистлеге, бакалавриатлагъа эм магистрантлагъа    билим бериу программала къураллыкъдыла.    Аны хайыры бла  ЛГПУ-ну выпускниклери, кеслеринде эм КъМКъУ-да къырал аттестацияны ётюп, эки диплом къоллу болаллыкъдыла. 

Юрий Альтудов вузла 2016 жылдан бери байламлыкъда ишлегенлерин эсге сала, жангы программагъа вузланы айырмалы педагоглары къатышырыкъларын, студентле ахшы билим аллыкъларына ийнаннганын да чертгенди. 

Жанна Марфина да белгиленнген планны  къыйматлылыгъына ишекли болмагъанын, ол эки жанына да хайырлы боллугъун  чертгенди. Арада байламлыкъ жюрютюлгенли бери илму эм академия жаны бла да уллу сынам жыйылгъанын айтханды. 

Эсге сала айтсакъ: 2016 жылда КъМКъУ бла Тарас Шевченко атлы  Луганск миллет университет (2020 жылдан бери Луганск къырал педагогика университет)  стратегия байламлыкъ жюрютюрге келишген эдиле.    Андан бери вузланы алимлери, преподавательлери, студентлери эм аспирантлары да  бирге илму конференциялагъа, форумлагъа,   конкурслагъа эм башха жыйылыулагъа да бирге тири  къатыша келедиле.  Кёп болмай этилген жангы келишим а байламлыкъны даражасын бютюн кётюрюрге,  кенгертирге болушурукъду.

Жууукъ заманда стратегиялы байламлыкъгъа кёре «жол карта» белгиленирикди, ызы бла специалистле сынау халда билим бериу жаны бла  программаланы  жарашдырып башларыкъдыла.