Сабий спортну айнырына къайгъырып

 РусГидро обществону регионда бёлюмюню болушлугъу бла Нальчикде СССР-ни спортуну устасы Александр Апшевни хурметине футболдан турнир болгъанды. Анга Нальчикден, Каспийскден, Владикавказдан, Новороссийскден бла Ставропольдан 7 футбол школну къауумлары къатышхандыла.

Быйылгъы матчлада Владикавказны «Аланиясы» хорлагъанды. «Кюмюшню» Каспийскни «Динамосу» алгъанды, «доммакъгъа» уа Нальчикни А.Апшевни атын жюрютген школуну командасы тийишли болгъанды. Айырмалы болгъан спортчула эм хорлагъан команданы баш тренери Владимир Салбиев энчи саугъала бла белгиленнгендиле. Эм иги судьягъа Нальчикден Руслан Шекемов саналгъанды. Кеслерини саугъаларын Александр Апшевни жууукъ-ахлулары да хазырлагъандыла.

 РусГидрону юсюнден айтханда, ол сабий спортну айнытыугъа жыл дайым себеплик этеди. Быйыл да аны республикада бёлюмю Черек районну 1-чи номерли спорт школуну ырысхы-техника онгларын игилендириуге, Аушигерде спорт залны жангыртыугъа ахча бергенди, баскетболдан командабызгъа Россейни чемпионатына къатышырча кийимле алгъанды, Къабарты-Малкъарны 100-жыллыкъ байрамына аталгъан эришиулени къураргъа болушады.